کیلیفورنیا: دنیا کی معروف ٹیکنالوجی کمپنی میٹا نے فیس بک گروپس میں پوسٹ کرتے وقت اصلی نام کی بجائے نِک نیم استعمال کرنے کی سہولت متعارف کرادی ہے۔ اس فیچر کا استعمال کرنے کے لیے گروپ ایڈمن کی اجازت حاصل کرنا ضروری ہوگا۔
میٹا کی جانب سے جاری کردہ اعلامیے کے مطابق، اب فیس بک گروپ کے ممبران اپنی پوسٹس، کمنٹس اور ری ایکشنز اپنے اصلی نام کی جگہ اپنی مرضی کے نِک نیم اور اواتار تصویر کے ساتھ کر سکیں گے۔ یہ تبدیلی ایسے افراد کے لیے متعارف کرائی گئی ہے جو اپنی شناخت کو چھپانے یا حقیقی نام کے استعمال سے جھجھک محسوس کرتے ہیں، خاص طور پر جب وہ حساس معاملات یا ذاتی موضوعات پر بات کرتے ہیں۔
نِک نیم صرف مخصوص گروپ تک محدود ہوگا، یعنی اگر کوئی ممبر نِک نیم منتخب کرتا ہے تو وہ صرف اسی گروپ میں نظر آئے گا۔ دوسرے گروپوں میں ممبر کا اصلی نام ہی ظاہر ہوگا۔ مزید یہ کہ اگر کوئی صارف نِک نیم منتخب کرتا ہے تو فیس بک اس کی پرانے پوسٹس کو بھی نئے نِک نیم کے ساتھ اپ ڈیٹ کر دے گا۔
نِک نیم فیچر کے استعمال کے دوران، لائیو ویڈیوز، نجی پیغامات اور دوسرے پلیٹ فارمز پر پوسٹس شیئر کرنے جیسے فیچرز عارضی طور پر غیر فعال ہو جائیں گے تاکہ اس فیچر کا غلط استعمال نہ ہو سکے۔
گروپ ایڈمنز کو یہ اختیار دیا گیا ہے کہ وہ نِک نیم فیچر کو آن یا آف کریں یا ہر نِک نیم کی انفرادی منظوری لیں تاکہ گروپ کی شرائط و ضوابط برقرار رہیں۔
میٹا کا مقصد:
میٹا کا کہنا ہے کہ یہ فیچر ان افراد کے لیے متعارف کرایا گیا ہے جو صحت، ذاتی معاملات یا حساس مسائل پر گفتگو کرتے ہوئے اپنی شناخت ظاہر کرنے سے گریز کرتے ہیں۔ اس سہولت کے ذریعے لوگ اپنے خیالات اور آراء کو زیادہ آزادی اور خوف کے بغیر شیئر کر سکیں گے۔
اس اقدام کا مقصد فیس بک گروپوں میں اظہارِ رائے کی آزادی کو فروغ دینا اور صارفین کی پرائیویسی کا تحفظ کرنا ہے، تاکہ وہ بلا خوف اپنی بات کہہ سکیں۔