تاریخ کا سچ

جب تاریخ کے قدیم قلعے کی فصیلوں پر شام اترتی ہے تو وہاں ایک بوڑھا مو¿رخ چراغ ہاتھ میں لیے خاموشی سے چلتا ہے۔ اس کے عقب میں سیاست کے بازی گر، سپہ سالار، سفارت کار اور تاجروں کے قافلے اپنے اپنے بیانیے کی تختیاں اٹھائے کھڑے ہوتے ہیں۔ ہر شخص دعویٰ کرتا ہے کہ اس نے آنے والے زمانے کا نقشہ اپنی مرضی سے کھینچا ہے، مگر مو¿رخ مسکراتا ہے، گرد آلود رجسٹروں کو بند کرتا ہے اور کہتا ہے کہ ریاستوں کی تقدیر کسی ایک جنگ، ایک معاہدے یا ایک حکمران کے فیصلے سے نہیں بدلتی بلکہ ان کے تہہ خانوں میں صدیوں سے سانس لیتے فکری رجحانات ہی مستقبل کے معمار بنتے ہیں۔ مشرقِ وسطیٰ کے حالیہ تغیرات بھی اسی حقیقت کا نیا باب ہیں۔ سفارتی یادداشتوں، پس پردہ مذاکرات، عسکری توازن اور معاشی مفاہمت کے پردے میں جو نئی صورتِ حال ابھر رہی ہے، وہ محض وقتی سیاسی کامیابی نہیں بلکہ اس امر کی علامت ہے کہ خطے میں طاقت کی پرانی تعریف ازسرِنو لکھی جا رہی ہے۔ جب کسی قوت کو میدان کے بجائے مذاکرات کی میز پر اپنی شرائط نرم کرنا پڑیں تو یہ صرف سفارت کاری کی کامیابی نہیں بلکہ زمینی حقائق کی ناگزیر بالادستی کا اعتراف بھی ہوتا ہے۔
اسی قلعے کے ایک اور گوشے میں ایک آئینہ آویزاں ہے جس میں ہر عہد کا حکمران اپنا چہرہ دیکھتا ہے، مگر آئینہ ہمیشہ ایک ہی جواب دیتا ہے کہ افراد بدلتے رہتے ہیں، نظریات زندہ رہتے ہیں۔ یہی وجہ ہے کہ اگر کسی خطے میں مسلسل ایک ہی نوعیت کی پالیسیاں، ایک ہی طرز کا جبر اور ایک ہی فکری تعصب نسل در نسل جاری رہے تو اس کی ذمہ داری محض چند سیاسی شخصیات پر ڈال دینا تاریخ کو شخصیات کی قید میں محصور کر دینے کے مترادف ہے۔ برصغیر سے فلسطین تک کے المناک ابواب اسی اصول کی گواہی دیتے ہیں کہ بعض ریاستی رویے افراد کے مزاج سے زیادہ ادارہ جاتی فکر اور قومی حکمتِ عملی کا حصہ بن جاتے ہیں۔ اسی لیے کسی ایک وزیراعظم، صدر یا عسکری قائد کی تبدیلی سے تاریخ کا دھارا یکسر تبدیل نہیں ہو جاتا۔ قوموں کے اجتماعی رویے ان کے سیاسی ڈی این اے میں پیوست ہوتے ہیں اور انہی کی بنیاد پر آنے والی نسلیں اپنے فیصلوں کی سمت متعین کرتی ہیں۔ دانش کا تقاضا یہی ہے کہ واقعات کو محض چہروں کی تبدیلی سے نہیں بلکہ ان فکری دھاروں سے سمجھا جائے جو ریاستی فیصلوں کی اصل بنیاد بنتے ہیں۔
قلعے کے صحن میں ایک آہن گر بھی بیٹھا ہے جو برسوں سے آگ کے الاو¿ پر فولاد کو تپاتا چلا آ رہا ہے۔ اس کے ہاتھوں کی سختی اس بات کی گواہ ہے کہ مضبوط دھات ایک دن میں نہیں بنتی بلکہ مسلسل حرارت، دباو¿ اور ضربوں کے بعد اپنی اصل قوت حاصل کرتی ہے۔ بعض ریاستوں کی مزاحمتی تاریخ بھی اسی آہن گر کے کارخانے سے مشابہ دکھائی دیتی ہے۔ طویل معاشی پابندیاں، سفارتی تنہائی، عسکری دباو¿ اور داخلی آزمائشیں اگر کسی قوم کے عزم کو شکست دینے کے بجائے مزید منظم کر دیں تو پھر وہ محض ایک ملک نہیں رہتی بلکہ ایک نفسیاتی اور تزویراتی حقیقت بن جاتی ہے۔ یہی وجہ ہے کہ حالیہ برسوں میں مشرقِ وسطیٰ کی کشمکش نے یہ سبق بھی دیا کہ عسکری طاقت صرف ہتھیاروں کی تعداد سے نہیں ناپی جاتی بلکہ قومی برداشت، سیاسی استقلال اور سفارتی بصیرت بھی اس کے بنیادی ستون ہوتے ہیں۔ جب یہی عناصر ایک دوسرے سے ہم آہنگ ہو جائیں تو بڑی سے بڑی قوت کو بھی اپنی حکمتِ عملی پر نظرثانی کرنا پڑتی ہے اور یہی مقام تاریخ میں حقیقی تبدیلی کا نقطہ آغاز بنتا ہے۔
رات کے آخری پہر جب مورخ قلعے کا دروازہ بند کرنے لگتا ہے تو وہ آخری بار مڑ کر کہتا ہے کہ تاریخ کبھی فاتحین کے نعروں سے نہیں لکھی جاتی بلکہ وقت کی عدالت میں ثابت ہونے والے حقائق سے مرتب ہوتی ہے۔ آج مشرقِ وسطیٰ میں ابھرنے والی نئی صف بندیاں، علاقائی تعاون کی بڑھتی ہوئی اہمیت، سفارتی ثالثی کا فروغ اور عالمی طاقتوں کے رویوں میں نمایاں تبدیلی اسی حقیقت کی نشان دہی کر رہی ہے کہ آنے والا دور شاید طاقت کی یک قطبی تعبیر کو قبول کرنے کے لیے آمادہ نہیں۔ اس منظرنامے میں پاکستان، چین، سعودی عرب، قطر، عمان اور دیگر علاقائی کرداروں کی بڑھتی ہوئی سفارتی فعالیت بھی اس امر کی غماز ہے کہ مستقبل کے فیصلے اب صرف دور دراز دارالحکومتوں میں نہیں بلکہ خود خطے کے اندر تشکیل پائیں گے۔ تاہم تاریخ کا سب سے بڑا سبق یہی ہے کہ کوئی بھی تجزیہ خواہ کتنا ہی دلکش کیوں نہ ہو، اگر وہ جذبات کے بجائے شواہد، تحقیق اور زمینی حقائق پر استوار نہ ہو تو وقت اسے بھی انہی بند صحیفوں میں رکھ دیتا ہے جنہیں ہر نئے عہد کا مو¿رخ خاموشی سے بند کر کے آگے بڑھ جاتا ہے۔