اسلام آباد : محکمہ موسمیات نے ملک بھر میں شدید سردی، بارشوں اور برفباری کا الرٹ جاری کر دیا ہے۔ آج ملک کے بیشتر علاقوں میں موسم سرد اور خشک رہے گا، لیکن شمالی علاقوں میں جزوی طور پر آسمان ابر آلود ہو سکتا ہے، اور گلگت بلتستان میں ہلکی بارش اور برفباری کی توقع ہے۔
اسلام آباد اور گردو نواح میں موسم سرد رہے گا اور آسمان جزوی طور پر ابر آلود ہو گا۔ بلوچستان کے زیادہ تر علاقے سرد رہیں گے، جبکہ سندھ میں بھی سرد اور خشک موسم رہے گا۔ خیبر پختونخوا کے زیادہ تر اضلاع میں موسم سرد اور جزوی طور پر ابر آلود رہنے کا امکان ہے، اور وہاں کے بالائی علاقوں میں شدید سردی ہو گی۔ کوہستان، چترال، بٹگرام اور دیگر شمالی علاقوں میں ہلکی بارش اور برفباری ہو سکتی ہے۔
محکمہ موسمیات کے مطابق 30 اور 31 دسمبر کے دوران سردی کی شدت میں اضافہ ہو سکتا ہے، اور 31 دسمبر سے 2 جنوری تک ملک کے مختلف حصوں میں بارش اور برفباری کا امکان ہے۔ مری، گلیات، سوات، شانگلہ اور دیگر شمالی علاقوں میں 29 سے 31 دسمبر کے دوران بارش اور برفباری کی پیشگوئی کی گئی ہے۔
30 دسمبر سے 2 جنوری تک گلگت، اسکردو، ہنزہ، وادی نیلم اور دیگر بالائی علاقوں میں شدید بارش اور برفباری ہو سکتی ہے۔ محکمہ موسمیات نے خبردار کیا ہے کہ برفباری کی وجہ سے پہاڑی علاقوں میں لینڈ سلائیڈنگ اور سڑکوں کی بندش کا خطرہ ہے۔ بالائی علاقوں میں برفانی تودے گرنے کا بھی امکان ہے، جس سے آمد و رفت متاثر ہو سکتی ہے۔