پشاور : پشاور میں ایف سی ہیڈکوارٹرز پر ہونے والے خودکش حملے کی تحقیقات میں اہم پیشرفت ہوئی ہے۔ خیبر پختونخوا پولیس کے مطابق حملے میں استعمال ہونے والی موٹرسائیکل چوری کی گئی تھی۔ پولیس حکام کا کہنا ہے کہ یہ موٹرسائیکل راولپنڈی سے چوری کی گئی تھی، اور اس کی چوری کی ایف آئی آر بھی متعلقہ تھانے میں درج تھی۔
تحقیقات کے دوران پولیس نے کئی مشتبہ افراد کو حراست میں لے لیا ہے اور ان سے تفتیش جاری ہے۔ حکام کا کہنا ہے کہ حملے کے حوالے سے مزید معلومات حاصل کرنے کی کوششیں جاری ہیں تاکہ اس وحشیانہ کارروائی کے پس پردہ حقائق تک پہنچا جا سکے۔
یاد رہے کہ 24 نومبر کو پشاور میں ایف سی ہیڈکوارٹرز پر خودکش حملہ ہوا تھا جس میں 3 ایف سی اہلکار شہید اور 10 افراد زخمی ہوئے تھے۔ حملے میں 3 دہشت گرد بھی مارے گئے تھے۔ اس حملے نے پورے علاقے میں سیکیورٹی کے حوالے سے تشویش کی لہر دوڑادی تھی، اور اب پولیس اس کے پیچھے موجود نیٹ ورک اور منصوبہ بندی کو بے نقاب کرنے کے لیے تفتیش کر رہی ہے۔
پولیس حکام کا کہنا ہے کہ اس کیس کی تحقیقات تیز رفتار طریقے سے کی جا رہی ہیں اور مجرموں کو انصاف کے کٹہرے میں لانے کے لیے ہر ممکن اقدام اٹھایا جا رہا ہے۔