ترقی کی ہوائیں پاکستان بدل رہی ہیں

قابلِ تجدید توانائی، بالخصوص ہوا سے پیدا ہونے والی بجلی، محض ایک متبادل نہیں بلکہ ایک ناگزیر حکمتِ عملی کے طور پر سامنے آئی ہے۔ جھمپر ٹھٹھہ ونڈ کوریڈور میں چائنا تھری گورجز کے ونڈ پاور منصوبے اس تبدیلی کی واضح مثال ہیں جو نہ صرف صاف توانائی فراہم کر رہے ہیں بلکہ مقامی آبادی کیلئے ٹھوس سماجی و معاشی فوائد بھی لیکر آئے ہیں۔ تھری گورجز فرسٹ (TGF)، تھری گورجز سیکنڈ (TGS) اور تھری گورجز تھرڈ (TGT) پر مشتمل یہ تین ونڈ فارمز مجموعی طور پر 148.5 میگاواٹ بجلی پاکستان کے قومی گرڈ میں شامل کر رہے ہیں۔ ہر منصوبے کی پیداواری صلاحیت 49.5 میگاواٹ ہے جو 33 ٹربائنز کے ذریعے حاصل کی جاتی ہے جن میں سے ہر ایک کی صلاحیت 1.5 میگاواٹ ہے۔ بلڈ ، اون، آپریٹ (BOO) ماڈل کے تحت تیار کیے گئے یہ منصوبے غیر ملکی سرمایہ کاری ، جدید ٹیکنالوجی اور مو¿ثر عملدرآمد کا بہترین امتزاج پیش کرتے ہیں۔ صرف تین کلومیٹر کے دائرے میں ان منصوبوں کی موجودگی نہ صرف آپریشنل کارکردگی کو بڑھاتی ہے بلکہ ترسیلی مسائل کو بھی کم کرتی ہے جس سے یہ مستقبل کے قابلِ تجدید توانائی منصوبوں کیلئے ایک مثالی نمونہ بن جاتے ہیں۔
ان منصوبوں کی تکمیل کا شیڈول بھی انکی کارکردگی اور عزم کی عکاسی کرتا ہے۔ TGF کی تعمیر جنوری 2013 میں شروع ہوئی اور یہ منصوبہ مقررہ وقت سے پہلے نومبر 2014 میں کمرشل آپریشن میں آ گیا۔ یہ سالانہ تقریباً 138.7 گیگاواٹ گھنٹے بجلی پیدا کرتا ہے، جسکا کپیسٹی فیکٹر تقریباً 32 فیصد ہے۔ اسکے بعد TGS اور TGT کے منصوبے مارچ 2017 میں شروع ہوئے اور جون 2018 تک مکمل ہو کر پیداوار شروع کر دی، وہ بھی مقررہ وقت سے پہلے۔ ان دونوں منصوبوں کا کپیسٹی فیکٹر تقریباً 35 فیصد ہے اور ہر ایک سالانہ تقریباً 151.8 گیگاواٹ گھنٹے بجلی پیدا کرتا ہے۔ یہ اعداد و شمار عالمی معیار کے مطابق ہیں اور ان منصوبوں کی تکنیکی صلاحیت کا واضح ثبوت ہیں۔ ان منصوبوں کی اصل اہمیت صرف انکی تکنیکی کامیابی تک محدود نہیں بلکہ جھمپرٹھٹھہ کے باسیوں پر انکے گہرے اثرات میں پوشیدہ ہے۔ یہ علاقہ ماضی میں پسماندگی کا شکار رہا ہے جہاں بنیادی ڈھانچے کی کمی، روزگار کے محدود مواقع اور بنیادی سہولیات تک رسائی کا فقدان نمایاں تھا۔ ونڈ پاور منصوبوں کے قیام نے اس علاقے کی سماجی و معاشی صورتحال میں نمایاں تبدیلی پیدا کی ہے۔سب سے اہم اور فوری فائدہ روزگار کے مواقع کی فراہمی ہے۔ تعمیراتی مرحلے کے دوران سیکڑوں مقامی افراد کو مختلف شعبوں میں ملازمتیں فراہم کی گئیں جن میں ہنر مند انجینئرنگ سے لے کر غیر ہنر مند مزدوری تک شامل ہے۔ اس سے بھی بڑھ کر، آپریشنل مرحلے میں یہ منصوبے مستقل روزگار فراہم کر رہے ہیں۔ مقامی ٹیکنیشنز اور انجینئرز کی تربیت پر خصوصی توجہ دی گئی جس سے ان کی مہارتوں میں اضافہ ہوا اور روزگار کے بہتر مواقع پیدا ہوئے۔ اس عمل نے مقامی افراد میں ان منصوبوں کے ساتھ وابستگی اور ملکیت کا احساس بھی پیدا کیا ہے۔
انفراسٹرکچر کی ترقی بھی ایک اہم پہلو ہے۔ سڑکوں کی تعمیر، ٹرانسپورٹ نیٹ ورک کی بہتری اور مقامی رابطوں میں اضافہ نہ صرف ان منصوبوں کی ضرورت تھی بلکہ اس سے مقامی آبادی کو بھی فائدہ پہنچا۔ اب لوگ بہتر انداز میں منڈیوں، ہسپتالوں اور تعلیمی اداروں تک رسائی حاصل کر سکتے ہیں جس سے انکی روزمرہ زندگی میں آسانی پیدا ہوئی ہے۔یہ بجلی قومی گرڈ میں شامل ہوتی ہے تاہم مجموعی پیداوار میں اضافے کے باعث لوڈشیڈنگ میں کمی آئی ہے۔ اسکا براہ راست فائدہ شہری اور دیہی علاقوں کو پہنچا ہے۔ مقامی سطح پر اسکا مطلب یہ ہے کہ کاروبار، زراعت اور گھریلو سرگرمیاں زیادہ تسلسل کے ساتھ جاری رہ سکتی ہیں۔ان منصوبوں نے مقامی معیشت کو بھی متحرک کیا ہے۔ بڑے صنعتی منصوبوں کی موجودگی نے چھوٹے کاروباروں جیسے دکانیں، ٹرانسپورٹ سروسز اور مرمتی خدمات کو فروغ دیا ہے۔ اسکے نتیجے میں آمدنی کے نئے ذرائع پیدا ہوئے ہیں اور مقامی افراد کی روایتی ذرائع معاش جیسے کھیتی باڑی اور ماہی گیری پر انحصار کم ہوا ہے۔سماجی ترقی کے اشاریوں میں بھی بہتری آئی ہے۔ کارپوریٹ سوشل ریسپانسبلٹی (CSR) پروگراموں کے تحت صحت کی سہولیات، صاف پانی کی فراہمی اور تعلیمی معاونت جیسے اقدامات کیے گئے ہیں جنہوں نے مقامی لوگوں کے معیارِ زندگی کو بہتر بنانے میں اہم کردار ادا کیا ہے۔
ماحولیاتی اعتبار سے بھی یہ منصوبے بے حد اہم ہیں۔ صاف اور قابلِ تجدید توانائی کی پیداوار کے ذریعے یہ پاکستان کے کاربن اخراج کو کم کرنے اور فوسل فیول پر انحصار گھٹانے میں مدد دے رہے ہیں۔ موسمیاتی تبدیلیوں کے تناظر میں جہاں پاکستان سیلاب، گرمی اور پانی کی قلت جیسے مسائل کا سامنا کر رہا ہے یہ اقدامات نہایت اہمیت کے حامل ہیں۔ ایندھن کی درآمدات میں کمی کے باعث قیمتی زرمبادلہ کی بچت ہو رہی ہے اور ادائیگیوں کے توازن میں بہتری آ رہی ہے۔ ہوا سے حاصل ہونے والی توانائی عالمی منڈی میں ایندھن کی قیمتوں کے اتار چڑھاﺅ سے متاثر نہیں ہوتی جس سے بجلی کی قیمتوں میں استحکام ممکن ہوتا ہے۔ توانائی ذخیرہ کرنے کی جدید ٹیکنالوجیز اور سمارٹ گرڈ سسٹم میں سرمایہ کاری ناگزیر ہے تاکہ اس شعبے سے مکمل فائدہ اٹھایا جا سکے۔ اسی طرح اگرچہ BOO ماڈل نے غیر ملکی سرمایہ کاری کو متوجہ کیا ہے لیکن طویل المدتی استحکام کیلئے مقامی سرمایہ کاری اور شراکت داری کو فروغ دینا بھی ضروری ہے۔ان تمام پہلوں کے باوجود چائنا تھری گورجز کے ونڈ پاور منصوبے ایک کامیاب مثال ہیں کہ کس طرح وژن، بین الاقوامی تعاون اور جدید ٹیکنالوجی کے امتزاج سے بڑے پیمانے پر تبدیلی ممکن ہے۔ یہ منصوبے پاکستان کے توانائی کے شعبے میں ایک نئے باب کی نشاندہی کرتے ہیں جہاں پائیداری، لچک اور شمولیت کو ترجیح دی جا رہی ہے۔