کیلیفورنیا : انسٹاگرام نے اپنے ریلز کیمرے میں ایک بڑی اپڈیٹ متعارف کرائی ہے، جس سے ویڈیوز بنانا اور ایڈٹ کرنا صارفین کے لیے مزید آسان ہوگیا ہے۔ اب صارفین ریلز کیمرے کے ذریعے 20 منٹ تک کی ویڈیوز ریکارڈ کر سکتے ہیں، جو پہلے کی ایک منٹ کی حد سے بہت زیادہ ہے۔
اس اپڈیٹ میں کئی نئی ایڈیٹنگ خصوصیات شامل کی گئی ہیں، جن میں "Undo" کا آپشن بھی شامل ہے، جس کی مدد سے اگر آپ کسی کلپ کو ریلز میں شامل کریں اور بعد میں اسے ہٹانا چاہیں، تو یہ بہت آسانی سے کیا جا سکتا ہے۔ اس کے ساتھ ہی "ٹچ اپ" موڈ میں بھی تبدیلی کی گئی ہے، جس سے صارفین فلٹرز اور پالش کی شدت کو اپنی مرضی سے کنٹرول کر سکتے ہیں۔
انسٹاگرام نے گرین سکرین فیچر کو بھی بہتر بنایا ہے اور ویڈیوز کی ریکارڈنگ کو مزید ہموار بنانے کے لیے کاؤنٹ ڈاؤن اور ٹائمنگ ٹولز میں اپگریڈ کیا ہے۔
تاہم، انسٹاگرام کا الگورڈم ابھی بھی 3 منٹ سے کم ویڈیوز کو ترجیح دیتا ہے، اس لیے اگرچہ اب لمبی ویڈیوز ریکارڈ کی جا سکتی ہیں، مگر یہ زیادہ دکھائی نہیں دیں گی۔ اس فیچر کا فائدہ خاص طور پر ان لوگوں کو ہوگا جو کہانی، ٹیوٹوریلز یا قسط وار مواد بناتے ہیں۔