اسلام آباد: صدر پاکستان آصف علی زرداری نے کہا ہے کہ پاکستان نے صاف توانائی کی جانب منتقلی کو اپنی قومی ترجیح بنا لیا ہے، کیونکہ آلودگی سے پاک توانائی نہ صرف موسمیاتی تبدیلیوں کا مقابلہ کرنے کے لیے ضروری ہے بلکہ یہ معاشی ترقی کے لیے بھی اہم ہے۔
صدر زرداری نے کہا کہ پاکستان موسمیاتی تبدیلیوں سے سب سے زیادہ متاثر ہونے والے ممالک میں شامل ہے، اور اس کے حل کے لیے حکومت نے آلودگی سے پاک توانائی کو اپنی پالیسی کا مرکز بنایا ہے۔ انہوں نے بتایا کہ پاکستان نے 2030 تک 30 فیصد الیکٹرک گاڑیوں کا ہدف مقرر کیا ہے تاکہ فضائی آلودگی اور سموگ جیسے مسائل کا مقابلہ کیا جا سکے۔
صدر نے مزید کہا کہ فضائی آلودگی کا مسئلہ عوامی صحت کے لیے بڑا چیلنج بن چکا ہے، اور اس کے سماجی و معاشی اثرات بھی تشویشناک ہیں۔ انہوں نے یہ بھی کہا کہ پاکستان کے توانائی مکس میں 35 فیصد صاف اور قابل تجدید توانائی شامل ہے، اور کم کاربن ترقی پاکستان کی موسمیاتی پالیسی کا ایک اہم جزو ہے۔
انہوں نے صاف توانائی کو نہ صرف ماحولیاتی بلکہ معاشی ضرورت بھی قرار دیا، کیونکہ یہ روزگار کے مواقع فراہم کرتی ہے اور ٹیکنالوجی کی ترقی میں مددگار ثابت ہوتی ہے۔ صدر نے اس بات کا عزم ظاہر کیا کہ پاکستان ایک قابل اعتماد اور پائیدار توانائی نظام بنانے کے لیے پُرعزم ہے۔
آسٹریلیا کے قومی دن پر پیغام:
صدر زرداری نے آسٹریلیا کے قومی دن پر گورنر جنرل اور آسٹریلیائی عوام کو مبارکباد دی، اور کہا کہ پاکستان آسٹریلیا کے ساتھ اپنے تعلقات کو بہت اہمیت دیتا ہے۔ ان کا کہنا تھا کہ دونوں ممالک کی شراکت داری باہمی احترام اور مشترکہ جمہوری اقدار پر مبنی ہے، اور پاکستان کا ارادہ ہے کہ وہ آسٹریلیا کے ساتھ تجارت، سرمایہ کاری، اور تعلیم کے شعبوں میں مزید تعاون کرے۔