غزہ امن معاہدہ اور پاکستان

عالمی سیاست میں بعض لمحات ایسے آتے ہیں جو محض وقتی واقعات نہیں ہوتے بلکہ آنے والی دہائیوں کے رخ متعین کرتے ہیں۔ غزہ امن معاہدہ بھی ایسا ہی ایک تاریخی موڑ ہے جس میں پاکستان کی شمولیت نے نہ صرف خطے کی سیاست کو نئی جہت دی ہے بلکہ مسلم دنیا میں پاکستان کے کردار کو ایک ذمہ دار، باوقار اور مؤثر ریاست کے طور پر اجاگر کیا ہے۔ امریکی صدر ڈونلڈ ٹرمپ کی سرپرستی میں طے پانے والے اس معاہدے میں وزیر اعظم پاکستان شہباز شریف اور فیلڈ مارشل عاصم منیر کی شرکت محض سفارتی نمائندگی نہیں بلکہ ایک گہری سیاسی بصیرت، دفاعی خودمختاری اور سٹریٹجک اعتماد کی علامت ہے۔
پاکستان کی خارجہ پالیسی کا بنیادی اصول ہمیشہ امن، مفاہمت اور اصولی موقف رہا ہے۔ غزہ جیسے حساس اور پیچیدہ معاملے میں پاکستان کا فریق بننا اس بات کا ثبوت ہے کہ اسلام آباد اب صرف بیانات تک محدود نہیں بلکہ عملی سفارت کاری کے ذریعے مظلوم اقوام کی آواز بننے کی صلاحیت رکھتا ہے۔ وزیر اعظم شہباز شریف کی بطور رکن شرکت اس حقیقت کو واضح کرتی ہے کہ پاکستان مسئلہ فلسطین کو محض ایک جذباتی یا مذہبی معاملہ نہیں بلکہ ایک سنجیدہ انسانی، قانونی اور سیاسی مسئلے کے طور پر دیکھتا ہے، جس کا حل طاقت کے بجائے مذاکرات اور افہام و تفہیم میں مضمر ہے۔
غزہ کی موجودہ صورتحال کو اگر زمینی حقائق کی روشنی میں دیکھا جائے تو یہ واضح ہوتا ہے کہ وہاں کے مظلوم مسلمان ایک طویل عرصے سے سیاسی تنہائی اور عملی بے بسی کا شکار رہے ہیں۔ ایسے میں پاکستان سمیت دیگر مسلم ممالک کی اس امن معاہدے میں شمولیت نے غزہ کے مسلمانوں کے گرد ایک مضبوط سفارتی حصار قائم کیا ہے۔ یہ حصار محض عسکری نہیں بلکہ سیاسی، اخلاقی اور قانونی نوعیت کا ہے، جو مستقبل میں فلسطینی عوام کو ان کے جائز حقوق دلوانے میں معاون ثابت ہو سکتا ہے۔ اس معاہدے کے دور رس اثرات فوری طور پر شاید مکمل طور پر نمایاں نہ ہوں، لیکن تاریخ گواہ ہے کہ بڑے تنازعات کا حل ہمیشہ بتدریج اور مستقل سفارتی دباؤ کے ذریعے ہی ممکن ہوا ہے۔ پاکستان کی شمولیت اس عمل کو اخلاقی وزن فراہم کرتی ہے اور مسلم دنیا کو یہ پیغام دیتی ہے کہ اجتماعی حکمت عملی اور متحدہ موقف ہی عالمی طاقتوں پر اثر انداز ہو سکتا ہے۔
بدقسمتی سے ملک کے اندر بعض عناصر اس پیش رفت کو خوشامدانہ یا کمزوری پر مبنی طرز عمل قرار دے رہے ہیں۔ یہ رویہ نہ صرف زمینی حقائق سے لاعلمی کا مظہر ہے بلکہ قومی مفاد کے تقاضوں سے بھی متصادم ہے۔ سفارت کاری میں شرکت کا مطلب سرنڈر نہیں بلکہ اپنے مؤقف کو مؤثر انداز میں عالمی فورمز پر پیش کرنا ہوتا ہے۔ پاکستان نے اس معاہدے میں شامل ہو کر نہ تو اپنے اصولی موقف سے دستبرداری اختیار کی ہے اور نہ ہی فلسطین کے کاز پر کوئی سمجھوتہ کیا ہے، بلکہ ایک ایسے راستے کا انتخاب کیا ہے جو بڑے خطرات سے بچاؤ اور طویل المدتی حل کی ضمانت بن سکتا ہے۔ بین المسلمین اتحاد کے تناظر میں دیکھا جائے تو یہ معاہدہ ایک ابتدائی مگر اہم قدم ہے۔ مسلم دنیا طویل عرصے سے داخلی اختلافات، جغرافیائی سیاست اور باہمی بداعتمادی کا شکار رہی ہے۔ غزہ امن معاہدے میں مشترکہ شرکت اس امید کو جنم دیتی ہے کہ مستقبل میں امتِ مسلمہ مشترکہ چیلنجز کا سامنا ایک متحد پلیٹ فارم سے کر سکے گی۔ پاکستان، اپنی جغرافیائی اہمیت، عسکری صلاحیت اور سفارتی تجربے کی بدولت، اس اتحاد میں ایک مرکزی کردار ادا کرنے کی اہلیت رکھتا ہے۔
دوسری جانب غزہ امن معاہدے میں پاکستان کی شمولیت پر جہاں بین الاقوامی سطح پر پذیرائی مل رہی ہے، وہیں ملک کے اندر بعض حلقوں کی جانب سے تنقید بھی سامنے آئی ہے۔ تاہم حکومتی ترجمان نے ان اعتراضات کو بے بنیاد قرار دیتے ہوئے کہا ہے کہ یہ فیصلہ قومی مفاد، امتِ مسلمہ کے اتحاد اور خطے میں امن کے لیے ناگزیر تھا۔ غزہ امن معاہدے میں پاکستان کی شمولیت پر ہونے والی داخلی تنقید دراصل اس وسیع تر سفارتی تناظر کو نظرانداز کرتی ہے جس میں یہ فیصلہ کیا گیا۔ خارجہ پالیسی محض جذباتی نعروں یا وقتی عوامی دباؤ کے تحت تشکیل نہیں دی جاتی بلکہ اس کا دارو مدار طویل المدتی قومی مفاد، علاقائی استحکام اور عالمی ذمہ داریوں پر ہوتا ہے۔ حکومتی ترجمان کا مؤقف اس حقیقت کی عکاسی کرتا ہے کہ پاکستان نے اس معاہدے میں شمولیت اختیار کر کے نہ صرف فلسطینی عوام کے دیرینہ مؤقف کو عالمی سطح پر تقویت دی ہے بلکہ امتِ مسلمہ کے اجتماعی کردار کو بھی ایک عملی سمت فراہم کی ہے۔ ایسے حساس عالمی معاملات میں مذاکراتی عمل کا حصہ بننا کمزوری نہیں بلکہ ایک بالغ نظری اور سیاسی تدبر کی علامت ہوتا ہے، جس کے ذریعے ریاستیں اپنے اصولی مؤقف کو مؤثر انداز میں دنیا کے سامنے رکھتی ہیں۔
اس ضمن میں یہ بات بھی قابلِ غور ہے کہ پاکستان نے اس معاہدے میں کسی بیرونی دباؤ یا وقتی مصلحت کے تحت شرکت نہیں کی بلکہ آزاد خارجہ پالیسی کے اس تسلسل کو برقرار رکھا ہے جس کی بنیاد خودمختاری، انصاف اور امن پر رکھی گئی ہے۔ تاریخ گواہ ہے کہ وہ اقوام جو تنازعات کے حل میں تعمیری کردار ادا کرتی ہیں، بالآخر عالمی اعتماد اور اخلاقی برتری حاصل کرتی ہیں۔ حکومتی ترجمان کا یہ کہنا کہ وقت اس فیصلے کی درستی ثابت کرے گا، محض ایک دعویٰ نہیں بلکہ اس یقین کا اظہار ہے کہ پاکستان کی یہ سفارتی پیش رفت مستقبل میں فلسطینی عوام کے لیے سیاسی تحفظ، انسانی امداد اور منصفانہ حل کی راہ ہموار کرنے میں معاون ثابت ہو گی۔ یہی وہ طرزِ فکر ہے جو پاکستان کو محض ایک فریق نہیں بلکہ امن کے ایک ذمہ دار اور معتبر علمبردار کے طور پر متعارف کراتا ہے۔
علاوہ ازیں  فیلڈ مارشل عاصم منیر کی اس پلیٹ فارم پر موجودگی  اور امریکی صدر کی جانب سے ان کو خوش آمدید کہنا، پاکستان کی دفاعی حکمت عملی پر عالمی اعتماد کی عکاسی کرتے ہیں۔ یہ ایک غیر معمولی پیش رفت ہے کہ دنیا کی ایک بڑی طاقت نہ صرف پاکستان کی عسکری قیادت کو تسلیم کرے بلکہ اس کے کردار کو امن کے تناظر میں سراہا جائے۔ اس سے یہ تاثر بھی تقویت پاتا ہے کہ پاکستان کی عسکری صلاحیت محض دفاع تک محدود نہیں بلکہ خطے میں توازن، استحکام اور امن کے قیام میں ایک ذمہ دار قوت کے طور پر دیکھی جا رہی ہے۔
آخر میں یہ کہا جا سکتا ہے کہ غزہ امن معاہدہ پاکستان کے لیے محض ایک سفارتی کامیابی نہیں بلکہ ایک اخلاقی امتحان بھی ہے، جس میں وہ اب تک سرخرو نظر آتا ہے۔ اگر یہ عمل اسی تسلسل، دیانت داری اور اصولی موقف کے ساتھ آگے بڑھتا رہا تو بعید نہیں کہ پاکستان مستقبل میں مسلم دنیا کیلئے ایک قابلِ اعتماد ثالث، فلاحی قوت اور امن کا پیامبر بن کر ابھرے۔ اس تمام جدوجہد کا مقصد کسی طاقت کی خوشنودی نہیں بلکہ خطے میں پائیدار امن، انسانی جانوں کا تحفظ اور مظلوموں کو انصاف دلانا ہے اور یہی کسی بھی ذمہ دار ریاست کا اصل امتحان ہوتا ہے۔