کیلیفورنیا : اگر آپ جی میل استعمال کرتے ہیں، تو آپ نے کبھی نہ کبھی نیوز لیٹرز کی بھرمار کا سامنا ضرور کیا ہو گا۔ مختلف ویب سائٹس پر سائن اپ کرنے سے اکثر ہم اپنی ای میل آئی ڈی دے دیتے ہیں، اور پھر روزانہ ان سائٹس سے ای میلز آنا شروع ہو جاتی ہیں۔
لیکن اب جی میل نے ایک نیا فیچر متعارف کرایا ہے جو ان غیر ضروری ای میلز سے نجات پانے میں آپ کی مدد کر سکتا ہے۔ یہ فیچر "منیج سبسکرپشنز" کہلاتا ہے، اور اس کا فائدہ یہ ہے کہ اب آپ ایک ہی جگہ پر دیکھ کر آسانی سے ان سبسکرپشنز کو منسوخ کر سکتے ہیں۔ پہلے آپ کو ایک ایک کر کے نیوز لیٹرز سے ان سبسکرائب کرنا پڑتا تھا، مگر اب یہ سب کچھ ایک ہی جگہ پر ہو گا۔
اس فیچر کو استعمال کرنے کا طریقہ:
موبائل پر:
جی میل ایپ کھولیں۔
مینیو بار سے نیچے جا کر "منیج سبسکرپشنز" پر کلک کریں۔
ویب براؤزر پر:
جی میل ویب سائٹ پر جائیں۔
بائیں طرف "مور" پر کلک کریں، پھر "منیج سبسکرپشنز" کو منتخب کریں۔
یہ فیچر ابھی ویب براؤزر پر تمام صارفین کے لیے دستیاب ہے، مگر موبائل ایپ میں یہ کچھ مخصوص ممالک تک ہی محدود ہے۔
منیج سبسکرپشنز میں آپ کو ان تمام نیوز لیٹرز کی فہرست ملے گی جنہیں آپ نے سبسکرائب کیا ہے۔ آپ ہر سبسکرائب کی ای میلز دیکھ سکتے ہیں، اور ان سبسکرائب کرنے کے لیے ہر نام کے سامنے "ان سبسکرائب" کا آپشن ہوگا۔
جب آپ ان سبسکرائب کا بٹن دبائیں گے، تو جی میل آپ سے تصدیق کرے گا کہ کیا آپ اس سینڈر کی ای میلز بند کرنا چاہتے ہیں۔ اس کے بعد وہ سینڈر آپ کو ای میل بھیجے گا تاکہ آپ کی ان سبسکرائب کرنے کی درخواست پر عمل ہو سکے، اور اس کے بعد ان کی تمام ای میلز آپ کے اسپام فولڈر میں چلی جائیں گی۔