واشنگٹن :امریکی صدر ڈونلڈ ٹرمپ نے مسلم دنیا کو ایک بار پھر ابراہیمی معاہدے کی طرف راغب کرنے کے لیے بڑا بیان جاری کر دیا ہے۔ صدر ٹرمپ نے تمام مسلمان ممالک سے باقاعدہ مطالبہ کیا ہے کہ وہ ابراہیمی معاہدے پر دستخط کریں۔
اپنے سوشل میڈیا پلیٹ فارم 'ٹرتھ سوشل' پر جاری ایک پیغام میں امریکی صدر نے مشرقِ وسطیٰ اور مسلم دنیا کے حوالے سے اپنی انتظامیہ کی ترجیحات کا اظہار کیا۔ انہوں نے کہا کہ تمام مسلم ممالک کو اس امن معاہدے کا حصہ بننا چاہیے۔
ایرانی سفارت کاری کے تناظر میں ایک انتہائی اہم نکتے کی طرف اشارہ کرتے ہوئے صدر ٹرمپ کا کہنا تھا کہ اگر ایران ہمارے ساتھ اپنے معاملات طے کرنے کے بعد ابراہیمی معاہدے پر بھی دستخط کر دیتا ہے، تو یہ ایک تاریخی اعزاز تصور کیا جائے گا۔
بین الاقوامی مبصرین کے مطابق صدر ٹرمپ کا یہ بیان ظاہر کرتا ہے کہ وہ اپنے دوسرے دورِ صدارت میں بھی اسرائیل اور مسلم ممالک کے درمیان تعلقات کی استواری (Abraham Accords) کو اپنی خارجہ پالیسی کا مرکزی نقطہ بنائے ہوئے ہیں اور اس بار ایران کو بھی اس دائرے میں لانے کی خواہش رکھتے ہیں۔