لاہور:جینیسس نے اپنی نئی فلیگ شپ الیکٹرک SUV GV90 کی تفصیلات سامنے لاتے ہوئے لگژری گاڑیوں کی دنیا میں ایک بڑا قدم اٹھایا ہے۔ نئی SUV میں طاقتور الیکٹرک موٹرز، جدید ٹیکنالوجی اور انتہائی پرتعیش کیبن کو یکجا کیا گیا ہے۔
GV90 میں 123.5 کلو واٹ آور کی بڑی بیٹری نصب کی گئی ہے، جس سے ایک چارج پر 310 میل سے زائد مسافت طے کرنے کی توقع ہے۔ تیز رفتار چارجنگ کے ذریعے بیٹری 10 سے 80 فیصد تک تقریباً 22 منٹ میں چارج ہوسکے گی۔
گاڑی میں دو الیکٹرک موٹرز دی گئی ہیں جو مجموعی طور پر 657 ہارس پاور اور 590 پاؤنڈ فٹ ٹارک پیدا کرتی ہیں۔ اس کے علاوہ آل وہیل ڈرائیو، ایئر سسپنشن اور فور وہیل اسٹیئرنگ بھی گاڑی کا حصہ ہیں۔
GV90 کے اندرونی حصے کو روایتی لگژری اور جدید ٹیکنالوجی کے امتزاج کے طور پر ڈیزائن کیا گیا ہے۔ مختلف نشستوں کی ترتیب کے ساتھ سات افراد تک کی گنجائش موجود ہے، جبکہ زیادہ لگژری GV90 Neolun میں چار نشستوں والا ایگزیکٹو کیبن، گھومنے والی نشستیں، ریفریجریٹر اور فولڈنگ ٹیبلز شامل ہیں۔
Neolun ماڈل کی سب سے منفرد خصوصیات میں پِلر لیس کوچ ڈورز شامل ہیں، جو گاڑی کو رولز رائس طرز کی شاہانہ شکل دیتے ہیں۔ کیبن میں لکڑی، پتھر، لیدر، اون اور کیشمیئر جیسے اعلیٰ معیار کے میٹریلز استعمال کیے گئے ہیں۔
ٹیکنالوجی کے میدان میں GV90 میں 23.6 انچ کا مرکزی ڈسپلے، 25 اسپیکر Bang & Olufsen آڈیو سسٹم، Pleos Connect انفوٹینمنٹ سسٹم اور AI اسسٹنٹ شامل ہیں۔
جینیسس نے ابھی گاڑی کی حتمی قیمت ظاہر نہیں کی، تاہم GV90 کے 2028 ماڈل کے طور پر مارکیٹ میں آنے کی توقع ہے اور ابتدائی گاڑیاں 2027 کے موسمِ گرما میں سڑکوں پر نظر آسکتی ہیں۔