لاہور: پاکستان سپر لیگ کے دسویں ایڈیشن میں ایک سنسنی سے بھرپور میچ کے دوران کوئٹہ گلیڈی ایٹرز نے کراچی کنگز کو 5 رنز سے شکست دے دی۔
یہ مقابلہ لاہور کے قذافی اسٹیڈیم میں کھیلا گیا، جہاں کوئٹہ نے پہلے بیٹنگ کرتے ہوئے 142 رنز اسکور کیے اور کراچی کو 143 رنز کا ہدف دیا۔ کراچی کی ٹیم مقررہ اوورز میں 138 رنز بنا سکی اور فتح سے صرف چند قدم دور رہ گئی۔
کراچی کی اننگز میں ٹم سائیفرٹ نے 47 اور جیمز وِنس نے 30 رنز کی اچھی کارکردگی دکھائی، تاہم دیگر بلے باز دباؤ میں آکر ٹیم کو فتح دلانے میں ناکام رہے۔
کوئٹہ کی جانب سے گیندبازوں نے شاندار بولنگ کی، محمد عامر، خرم شہزاد اور محمد وسیم جونیئر نے دو، دو کھلاڑیوں کو پویلین واپس بھیجا اور کراچی کی بیٹنگ لائن کو بریک لگا دیا۔
کوئٹہ کی اس کامیابی نے ٹیم کے حوصلے بلند کر دیے ہیں، جبکہ کراچی کو اگلے میچز میں کم بیک کے لیے سخت محنت کرنا ہوگی۔