کیلیفورنیا: انسٹا گرام نے اپنے صارفین کے لیے ڈائریکٹ میسجز (ڈی ایمز) میں نئے اور دلچسپ فیچرز متعارف کرائے ہیں۔ ان تبدیلیوں کی بدولت انسٹا گرام نے میسجنگ کا تجربہ مزید بہتر اور سہولت بخش بنا دیا ہے۔ کمپنی کا کہنا ہے کہ یہ فیچرز ایپل آئی میسج اور دیگر میسجنگ ایپس کے لیے ایک اہم متبادل بن چکے ہیں۔
نئے فیچرز میں سب سے اہم زبانوں کا ترجمہ کرنے کا فیچر ہے، جس کے ذریعے صارفین اب 99 مختلف زبانوں میں پیغامات کا ترجمہ کر سکیں گے۔ اس کے علاوہ، صارفین اب اپنے چیٹس میں میوزک کلپس بھی شیئر کر سکیں گے۔ اس فیچر کے استعمال کے لیے چیٹ کمپوزر اسکرین میں سٹیکر بٹن پر کلک کر کے میوزک آپشن کا انتخاب کیا جا سکتا ہے، جس سے 30 سیکنڈ کے میوزک کلپ کو گروپ چیٹس یا براڈکاسٹ چینلز میں شیئر کیا جا سکے گا۔
انسٹا گرام نے ایک اور نیا فیچر بھی متعارف کرایا ہے جس میں صارفین اپنے اہم پیغامات کو پن کر سکتے ہیں۔ اس فیچر کی بدولت، اہم میسجز چیٹ ونڈو کے اوپر دکھائے جائیں گے، اور ہر چیٹ میں 3 میسجز کو پن کرنے کی اجازت ہوگی۔ مزید برآں، میسجز کو 29 دن تک شیڈول کرنے کا فیچر بھی شامل کیا گیا ہے۔