اسلام آباد : وزیراعظم شہباز شریف سے متحدہ عرب امارات (یو اے ای) کے سفیر کی ملاقات ہوئی، جس میں دونوں ممالک کے درمیان مضبوط اور برادرانہ تعلقات پر بات چیت کی گئی۔ وزیراعظم نے پاکستان اور یو اے ای کے تعلقات کی اہمیت کو اجاگر کرتے ہوئے یو اے ای کی قیادت کے لیے نیک تمناؤں اور خیر سگالی کے جذبات کا اظہار کیا۔
انہوں نے کہا کہ دونوں ممالک کے تعلقات کئی دہائیوں سے باہمی احترام اور تعاون پر قائم ہیں۔ وزیراعظم نے یو اے ای کے صدر اور ابوظہبی کے حکمران کے پاکستان کے آئندہ دورے کا بھی منتظر ہونے کا ذکر کیا اور اس دورے کو تعلقات کو مزید مستحکم کرنے کا موقع قرار دیا۔
وزیراعظم نے دونوں ممالک کے درمیان دوطرفہ تجارت کے حجم پر اطمینان کا اظہار کرتے ہوئے کہا کہ یہ تعلقات اقتصادی میدان میں بھی کامیاب ثابت ہو رہے ہیں۔ ساتھ ہی انہوں نے پاکستان کی اقتصادی ترقی اور استحکام کے لیے اہم شعبوں میں یو اے ای کو سرمایہ کاری کی دعوت دی۔