استنبول : ترک خاتون اول ایمن اردوغان نے امریکی خاتون اول میلانیا ٹرمپ سے اپیل کی ہے کہ وہ غزہ میں جاری اسرائیل-فلسطین جنگ سے متاثرہ بچوں کے لیے ویسا ہی درد دکھائیں جیسا انہوں نے یوکرین کے بچوں کے لیے کیا تھا۔ ایمن اردوغان نے کہا ہے کہ غزہ بچوں کا قبرستان بن چکا ہے اور وہاں لاکھوں لوگ شدید قحط اور غذائی قلت کا شکار ہیں۔
انہوں نے میلانیا ٹرمپ سے کہا کہ وہ اسرائیلی وزیراعظم بنیامین نتن یاہو سے براہِ راست رابطہ کر کے غزہ میں انسانی بحران ختم کروائیں۔ ایمن اردوغان نے اپنے خط میں لکھا کہ ہزاروں غزہ کے بچوں کے کفنوں پر "نامعلوم بچہ" لکھا ہے، جو ایک ایسا زخم ہے جس کا کوئی مداوا نہیں۔
یہ خط ایسے وقت آیا ہے جب اقوام متحدہ کے ماہرین کے مطابق غزہ میں تقریباً پانچ لاکھ لوگ قحط کی شدت سے متاثر ہیں اور 132,000 بچے زندگی کی بازی ہارنے کے خطرے میں ہیں۔ عام طور پر سیاست سے دور رہنے والی ترک خاتون اول نے اس سے پہلے بھی شام کی خانہ جنگی اور غزہ کی صورتحال پر عالمی رہنماؤں کو خطوط لکھ کر توجہ دلائی ہے۔