پاکستان اور روس کے درمیان اعلیٰ سطح کا رابطہ: وزیراعظم کے دورہ روس کی تاریخوں پر مشاورت

اسلام آباد: نائب وزیراعظم اور وزیرِ خارجہ سینیٹر اسحاق ڈار اور روسی وزیرِ خارجہ سرگئی لاروف کے درمیان ایک اہم ٹیلیفونک رابطہ ہوا ہے، جس میں دوطرفہ تعلقات اور عالمی سیاسی صورتحال پر تفصیلی تبادلہ خیال کیا گیا۔    دورہ روس کی تیاری: دونوں رہنماؤں نے وزیراعظم شہباز شریف کے آئندہ دورہ روس کے لیے نئی تاریخوں پر مشاورت کی اور اس دورے کو کامیاب بنانے کے لیے عزم کا اظہار کیا۔
 روسی وزیرِ خارجہ سرگئی لاروف نے ایران اور امریکہ کے درمیان جاری کشیدگی کو کم کرنے اور مذاکرات کی راہ ہموار کرنے میں پاکستان کے مثبت اور متحرک کردار کو خاص طور پر سراہا۔
 گفتگو کے دوران عالمی امن اور علاقائی استحکام کے حوالے سے مشترکہ کوششوں پر زور دیا گیا۔ دونوں رہنماؤں نے اس بات پر اتفاق کیا کہ بدلتے ہوئے عالمی حالات میں ماسکو اور اسلام آباد کا مسلسل رابطہ ضروری ہے۔اسحاق ڈار نے اپنے روسی ہم منصب کو پاکستان کے دورے کی دعوت دی، جسے دونوں ممالک کے درمیان بڑھتے ہوئے اعتماد کی علامت قرار دیا جا رہا ہے۔
فریقین نے تمام شعبوں میں باہمی تعاون کو مزید وسعت دینے اور علاقائی و عالمی فورمز پر ایک دوسرے کے ساتھ قریبی ہم آہنگی برقرار رکھنے کے عزم کا اعادہ کیا۔