سولر صارفین کے لیے نیپرا کا بڑا ریلیف: آف گرڈ سسٹم پر لائسنس کی کوئی پابندی نہیں

اسلام آباد:  نیشنل الیکٹرک پاور ریگولیٹری اتھارٹی (NEPRA) نے سولر صارفین کے حوالے سے پائی جانے والی تشویش کو ختم کرتے ہوئے واضح کیا ہے کہ آف گرڈ سولر صارفین کے لیے کسی بھی قسم کا لائسنس حاصل کرنا ضروری نہیں ہے۔
ترجمان نیپرا کی جانب سے جاری کردہ بیان میں کہا گیا ہے کہ سولر سسٹم سے متعلق قوانین میں کوئی ایسی تبدیلی نہیں کی گئی جس سے عام صارفین متاثر ہوں۔ خبر کی تفصیلات درج ذیل ہیں:
نیپرا کے مطابق وہ صارفین جو نیشنل گرڈ سے بجلی نہیں لیتے اور صرف اپنی ضرورت کے لیے سولر استعمال کرتے ہیں، انہیں لائسنس سے استثنیٰ حاصل ہے۔ لائسنس کی شرط صرف نیٹ میٹرنگ یا نیٹ بلنگ (بجلی فروخت کرنے والے) صارفین کے لیے ہے۔ ترجمان نے وضاحت کی کہ 25 کلوواٹ سے زائد بجلی پیدا کرنے والے سسٹم کے لیے لائسنس کی شرط پہلے سے موجود تھی اور اس میں کوئی نیا اضافہ نہیں کیا گیا۔
 آف گرڈ صارفین کا چونکہ قومی بجلی کے نظام سے کوئی تکنیکی تعلق نہیں ہوتا، اس لیے ریگولیٹری اتھارٹی ان پر لائسنس کی شرط لاگو نہیں کرتی۔
نیپرا کے اس بیان کے بعد ان صارفین نے سکھ کا سانس لیا ہے جو اپنی چھتوں پر چھوٹے سولر یونٹس لگا کر بجلی کے بھاری بلوں سے بچنے کی کوشش کر رہے ہیں۔ اتھارٹی نے سوشل میڈیا پر گردش کرنے والی ان تمام خبروں کو بے بنیاد قرار دیا ہے جن میں ہر سولر صارف کے لیے لائسنس کو لازمی قرار دیا جا رہا تھا۔