لاہور: وزیر اطلاعات پنجاب عظمیٰ بخاری نے اعلان کیا ہے کہ تحریک لبیک پاکستان (ٹی ایل پی) پر جلد پابندی لگائی جائے گی۔ انہوں نے کہا کہ ہڑتال کے نام پر اگر کسی نے کاروبار یا ٹرانسپورٹ بند کرنے کی کوشش کی تو ان کے خلاف سخت قانونی کارروائی کی جائے گی، اور ایسے افراد پر دہشت گردی کے مقدمات درج کیے جائیں گے۔
پریس کانفرنس میں وزیر اطلاعات نے بتایا کہ ٹی ایل پی کی فنڈنگ کا سلسلہ روک دیا گیا ہے، اور اس جماعت کے اکاؤنٹس فریز کر دیے گئے ہیں۔ عظمیٰ بخاری نے اس بات کی تصدیق کی کہ سعد رضوی اور ٹی ایل پی کے دیگر قائدین پر ماضی میں تشدد کی کارروائیوں میں ملوث ہونے کے الزامات ہیں۔ انہوں نے والدین کو خبردار کیا کہ وہ اپنے بچوں کو ٹی ایل پی کی سرگرمیوں سے دور رکھیں، ورنہ ان پر دہشت گردی کے مقدمات عائد کیے جا سکتے ہیں۔
عظمیٰ بخاری نے یہ بھی کہا کہ پنجاب میں اسلحہ لائسنس کی فراہمی پر پابندی عائد کر دی گئی ہے اور اسلحہ ڈیلرز کی درخواستوں کا جائزہ لیا جا رہا ہے۔ اس کے علاوہ، حکومت نے انتہاپسند جتھوں کی تشہیر کو روکنے کے لیے ان کے پوسٹرز اور وال چاکنگ کو ہٹانے کا عمل شروع کر دیا ہے۔
انہوں نے پنجاب میں غیر قانونی افغان باشندوں کے خلاف کارروائیاں بھی جاری رکھنے کا اعلان کیا، اور کہا کہ ایسے افراد کے خلاف معلومات اکٹھی کی جا رہی ہیں جو ٹیکس نہیں دیتے یا غیر قانونی طور پر ملک میں مقیم ہیں۔
وزیر اطلاعات نے آخر میں کہا کہ ریاست کے خلاف کسی بھی قسم کی کارروائی ناقابل برداشت ہے اور ایسے عناصر کے خلاف قانون کے مطابق سخت کارروائی کی جائے گی۔ ان کا کہنا تھا کہ حکومت شہریوں کے تحفظ کے لیے ہر ممکن قدم اٹھا رہی ہے اور کسی کو بھی روزمرہ زندگی میں خلل ڈالنے کی اجازت نہیں دی جائے گی۔