تہران : ایران نے اپنے مشہور چالوس جنگل میں لگی آگ کے پھیلاؤ کے بعد عالمی سطح پر مدد کی اپیل کی ہے، خاص طور پر ہائیرکینین جنگلات کے اُس حصے کو بچانے کے لیے جو یونیسکو کی عالمی ورثہ کی فہرست میں شامل ہیں۔ یہ جنگلات ایران اور آذربائیجان میں بحیرۂ کیسپیئن کے ساحل کے ساتھ پھیلے ہوئے ہیں اور ان کی عمر تقریباً 25 سے 50 ملین سال تک بتائی جاتی ہے۔
مقامی میڈیا کے مطابق، ترکی کے فائر فائٹنگ طیارے مرزن آباد پہنچ چکے ہیں، اور روس، بیلاروس اور آذربائیجان نے بھی اس مشکل صورتحال میں مدد کی پیشکش کی ہے۔ یہ آگ 20 دن پہلے لگی تھی اور اگرچہ ایک ہفتہ قبل اس پر قابو پایا گیا تھا، لیکن موسمی حالات کی خرابی کی وجہ سے یہ دوبارہ بھڑک اُٹھی۔ اس وقت زمین اور فضا سے جنگل میں لگی آگ کو بجھانے کی کوششیں جاری ہیں۔
اب تک آگ کی وجہ سے 40 ہیکٹر جنگل جل چکا ہے، اور اس کی مزید تباہی کو روکنے کے لیے ایران عالمی سطح پر مدد طلب کر رہا ہے۔ ہائیرکینین جنگلات نہ صرف اپنے بھرپور نباتاتی اور حیوانی تنوع کے لیے مشہور ہیں بلکہ انہیں عالمی ثقافتی ورثہ کا درجہ بھی حاصل ہے، جس کی وجہ سے ان کی حفاظت انتہائی اہمیت کی حامل ہے۔