سوشل میڈیا ، متوسط طبقہ اور دکھاوے کی معیشت

آج کا متوسط طبقہ اپنے گھر کی دیواروں سے کم اور اپنے موبائل فون کی سکرین کی دیواروں سے زیادہ پہچانا جاتا ہے۔ کبھی متوسط طبقہ کی شناخت اس کی تعلیم، اخلاق، سادگی اور محنت سے ہوتی تھی مگر اب اس کی پہچان کیفے کی تصاویر، برانڈڈ بیگز، سجاوٹ والے کچن، اور "ریلز" کی چمک دمک سے ہونے لگی ہے۔ معیشت کی اصطلاحات میں اسے "کھپت پر مبنی شناخت" کہا جا سکتا ہے مگر عام زبان میں یہ دکھاوے کی معیشت ہے۔ ایک ایسا معاشی اور سماجی ڈھانچہ جس میں اصل کمائی سے زیادہ اہم اس کی نمائش ہو گئی ہے۔ سوشل میڈیا نے نہ صرف اظہار کا پلیٹ فارم فراہم کیا ہے بلکہ ایک نیا مقابلہ بھی پیدا کر دیا ہے۔ ہر فرد اپنے روزمرہ کو ایک سٹیج پر بدل چکا ہے۔ متوسط طبقہ جو کبھی اپنی محدود آمدن کے باوجود وقار سے جیتا تھا اب اپنے معیارِ زندگی کو دوسروں کی سکرینوں سے ناپنے لگا ہے۔ مسئلہ یہ نہیں کہ لوگ اچھا کھائیں، اچھا پہنیں یا گھومیں پھریں، مسئلہ یہ ہے کہ وہ یہ سب اپنی استطاعت کے مطابق نہیں بلکہ دوسروں کی نمائش کے دباؤ میں کرنے لگے ہیں۔ یہ دباؤ خاموش ہے مگر شدید ہے۔
بینکوں کے کریڈٹ کارڈ، ’’بائے ناؤ پے لیٹر‘‘ سکیمیں، آن لائن سیلز، قسطوں پر موبائل اور فرنیچر یہ سب ایک ایسے متوسط طبقے کو سہارا دے رہے ہیں جو اپنی اصل آمدن سے بڑا نظر آنا چاہتا ہے۔ معاشی اعداد و شمار بتاتے ہیں کہ شہری علاقوں میں گھریلو قرضوں میں اضافہ ہو رہا ہے اور اس کا ایک بڑا حصہ غیر پیداواری اخراجات پر مشتمل ہے۔ یعنی آمدن وہی ہے مگر خرچ بڑھ رہا ہے اور مسئلہ یہ ہے کہ یہ خرچ ضرورت پر نہیں تاثر دکھانے اور بڑھانے پر ہو رہا ہے۔ اس دکھاوے کی معیشت کا سب سے بڑا نقصان ذہنی صحت پر پڑ رہا ہے۔ نوجوان نسل موازنہ کی بیماری میں مبتلا ہے۔ وہ اپنے عام دن کو دوسروں کے خاص دن سے موازنہ کرتے ہیں۔ انہیں لگتا ہے کہ سب خوش ہیں، سب کامیاب ہیں، سب آگے نکل گئے ہیں سوائے ہمارے حالانکہ سوشل میڈیا ایک ایڈٹ شدہ زندگی دکھاتا ہے حقیقت نہیں۔ متوسط طبقے کے نوجوان جب اپنی اصل زندگی کو اس فلٹر شدہ دنیا سے ملاتے ہیں تو ان میں احساسِ کمتری، بے چینی اور ناکامی کا خوف بڑھتا ہے۔
یاد رکھئے کہ یہ صرف فرد کا مسئلہ نہیں بلکہ یہ معاشرتی ڈھانچے کا مسئلہ ہے۔ جب پورا طبقہ نمائشی کلچر میں داخل ہو جائے تو اصل اقدار پس منظر میں چلی 
جاتی ہیں۔ بچت، سادگی، منصوبہ بندی اور طویل مدتی استحکام کی جگہ فوری تسکین لے لیتی ہے۔ ہم ایک ایسی معیشت کی طرف بڑھ رہے ہیں جہاں کھپت ترقی کا پیمانہ ہے، چاہے وہ ادھار کی کیوں نہ ہو۔ متوسط طبقہ کسی بھی ملک کی ریڑھ کی ہڈی ہوتا ہے۔ اگر یہی طبقہ غیر مستحکم ہو جائے تو معاشی اور سماجی توازن بگڑ جاتا ہے۔ ہمیں یہ سوال پوچھنا ہو گا کہ کیا ہم اپنی حقیقی ضروریات کے مطابق زندگی گزار رہے ہیں یا الگورتھم کے مطابق؟ کیا ہم معیشت کو چلا رہے ہیں یا معیشت ہمیں چلا رہی ہے؟ دکھاوے کی معیشت وقتی خوشی دیتی ہے مگر طویل مدتی بے یقینی پیدا کرتی ہے۔ شاید وقت آ گیا ہے کہ متوسط طبقہ دوبارہ اپنی اصل طاقت کو پہچانے یعنی محنت، وقار اور اعتدال کیونکہ سکرین کی روشنی وقتی ہے مگر قرض کی قسطیں طویل ہوتی ہیں۔
یہاں ایک اور پہلو بھی غور طلب ہے کہ سوشل میڈیا نے نہ صرف خرچ کرنے کا رجحان بڑھایا ہے بلکہ "زندگی کے معیار" کی تعریف بھی بدل دی ہے۔ پہلے معیارِ زندگی کا مطلب مستحکم روزگار، بچوں کی تعلیم، اپنا گھر اور مناسب بچت ہوا کرتا تھا۔ اب معیارِ زندگی کا مطلب چھٹیوں کی تصاویر، مہنگے ریستوران اور فیشن ایبل طرزِ زندگی سمجھا جانے لگا ہے۔ یہ تبدیلی بظاہر معمولی لگتی ہے مگر اس کے اثرات گہرے ہیں کیونکہ جب ترجیحات بدلتی ہیں تو فیصلے اور اصول بھی بدل جاتے ہیں۔متوسط طبقہ ہمیشہ توازن کا نام تھا۔ نہ وہ اشرافیہ کی طرح فضول خرچ ہوتا تھا اور نہ ہی نچلے طبقے کی طرح مکمل محرومی کا شکار۔ اس کے پاس محدود وسائل ہوتے تھے مگر وہ ان وسائل کو منصوبہ بندی سے استعمال کرتا تھا۔ آج وہی طبقہ وقتی خوشیوں کے لیے طویل مدتی استحکام کو قربان کر رہا ہے۔ قسطوں کی آسانی نے خریداری کو سہل بنا دیا ہے مگر ادائیگی کی ذمہ داری پھر بھی باقی رہتی ہے۔ مسئلہ سہولت نہیں، ذہنیت ہے۔ہمیں یہ بھی سمجھنا ہوگا کہ الگورتھم ہماری کمزوریوں کو جانتا ہے۔ وہ ہمیں وہی دکھاتا ہے جو ہمیں بے چین کرے، جو ہمیں خریدنے پر مجبور کرے، جو ہمیں موازنہ پر آمادہ کرے۔ ایک عام صارف سمجھتا ہے کہ وہ اپنی مرضی سے دیکھ رہا ہے حالانکہ وہ ایک ترتیب شدہ معاشی حکمتِ عملی کا حصہ بن چکا ہوتا ہے۔ اس طرح فرد صرف صارف نہیں رہتا بلکہ خود ایک پروڈکٹ بن جاتا ہے۔ اس کی توجہ، اس کا وقت اور اس کی خواہشات سب بیچی اور خریدی جاتی ہیں۔
اس صورتحال میں سب سے زیادہ متاثر وہ گھرانے ہوتے ہیں جو پہلے ہی معاشی دباؤ میں ہوں۔ جب آمدن محدود ہو اور اخراجات بڑھتے جائیں تو گھریلو کشیدگی میں اضافہ ہوتا ہے۔ میاں بیوی کے درمیان مالی اختلافات، والدین اور بچوں کے درمیان خواہشات کا ٹکراؤ اور مسلسل معاشی پریشانی ایک خاموش ذہنی بحران کو جنم دیتی ہے۔ مگر چونکہ باہر کی دنیا میں سب کچھ "خوش" دکھائی دیتا ہے، اس لیے لوگ اپنی اصل پریشانی چھپاتے رہتے ہیں۔یہ بھی ایک حقیقت ہے کہ سوشل میڈیا نے بہت سے لوگوں کو روزگار دیا، مواقع دیئے، اظہار کی آزادی دی۔ مگر ہر ٹیکنالوجی کی طرح اس کا استعمال بھی شعور کا متقاضی ہے۔ اگر ہم اسے محض نمائش کے لیے استعمال کریں گے تو یہ ہمیں عدم استحکام کی طرف لے جائے گا اور اگر اسے علم، ہنر اور مثبت نیٹ ورکنگ کے لیے استعمال کریں گے تو یہی پلیٹ فارم ترقی کا ذریعہ بھی بن سکتا ہے۔اصل مسئلہ یہ نہیں کہ سوشل میڈیا موجود ہے، اصل مسئلہ یہ ہے کہ کیا ہم اس کے استعمال میں توازن برقرار رکھ پا رہے ہیں؟ کیا ہم اپنے بچوں کو یہ سکھا رہے ہیں کہ اصل کامیابی تصویر نہیں بلکہ کردار ہے؟ کیا ہم انہیں یہ سمجھا رہے ہیں کہ زندگی کی قدر لائکس کی تعداد سے نہیں بلکہ سکونِ قلب سے ہوتی ہے؟۔
متوسط طبقے کو دوبارہ اپنی تعریف خود طے کرنا ہو گی۔ اسے فیصلہ کرنا ہو گا کہ وہ اپنی شناخت قرض کی چمک سے بنائے گا یا محنت کی روشنی سے۔ اسے یہ طے کرنا ہوگا کہ وہ وقتی تاثر کے پیچھے بھاگے گا یا مستقل استحکام کی طرف بڑھے گا۔ کیونکہ تاریخ گواہ ہے کہ قومیں اسی وقت مضبوط ہوتی ہیں جب ان کا متوسط طبقہ مضبوط ہو اور وہ اسی وقت مضبوط ہوتا ہے جب اس کی بنیاد حقیقت پر ہو، دکھاوے پر نہیں۔ہمیں یہ اعتراف کرنا ہوگا کہ سوشل میڈیا نے ہماری خواہشات کو تیز کر دیا ہے، مگر ہماری آمدن کو نہیں۔ خواہش اور استطاعت کے درمیان جو فاصلہ پیدا ہوتا ہے وہی قرض، اضطراب اور عدم اطمینان کو جنم دیتا ہے۔ اس فاصلے کو کم کرنے کا ایک ہی طریقہ ہے، اعتدال۔ شاید اب وقت آ گیا ہے کہ ہم اپنی سکرینوں کی چمک سے چند قدم پیچھے ہٹ کر اپنی اصل زندگی کو دیکھیں اور یہ سوال کریں کہ کیا ہم واقعی خوش ہیں یا صرف خوش نظر آ رہے ہیں۔ کیونکہ آخرکار انسان اپنی زندگی جیتا ہے اسے پوسٹ نہیں کرتا۔