کویت : پاکستانی نژاد کاروباری شخصیت معیز احمد مرزا نے انگلینڈ کے فٹبال کلب پلیمتھ پارک وے ایف سی کی ملکیت حاصل کرلی۔ کویت میں مقیم معیز مرزا نے یہ کلب اپنی تعلیمی کمپنی ایم ای سی سٹڈی گروپ کے ذریعے خریدا ہے۔
کراچی میں پیدا ہونے والے معیز مرزا انگلینڈ میں کسی فٹبال کلب کی ملکیت حاصل کرنے والے دوسرے پاکستانی بن گئے ہیں۔ ان سے قبل پاکستانی نژاد امریکی کاروباری شخصیت شاہد خان انگلش فٹبال کلب کی ملکیت حاصل کرچکے ہیں۔
پلیمتھ پارک وے ایف سی کا قیام 1988 میں عمل میں آیا تھا اور کلب اپنے گھریلو مقابلے بولیٹھو پارک میں کھیلتا ہے۔ موجودہ سیزن میں ٹیم انگلش فٹبال کے ساتویں درجے میں شامل سدرن لیگ پریمیئر ڈویژن ساؤتھ میں حصہ لے رہی ہے۔
کلب کا تعلق پلیمتھ شہر سے ہے اور یہ شہر کے معروف فٹبال کلب پلیمتھ آرگائل کے مقابلے میں چار درجات نیچے کھیل رہا ہے۔
نئی ملکیت سنبھالنے کے بعد معیز مرزا نے کلب کے لیے طویل المدتی منصوبوں کا عندیہ دیا ہے۔ ان کے مطابق مقصد پلیمتھ پارک وے کو اگلے 10 برس کے دوران ترقی دیتے ہوئے انگلش فٹبال لیگ (EFL) تک پہنچانا ہے۔
معیز مرزا کی آمد کے بعد کلب کے انتظامی اور ترقیاتی منصوبوں میں توسیع کی توقع کی جا رہی ہے، جبکہ نئے مالک کا ہدف ٹیم کو مرحلہ وار انگلش فٹبال کے اعلیٰ درجات میں پہنچانا ہے۔