راولپنڈی: پاکستان اور جنوبی افریقا کے درمیان جاری دوسرے ٹیسٹ میچ کے دوسرے روز پاکستان کی پوری ٹیم پہلی اننگز میں 333 رنز بنا کر آؤٹ ہوگئی۔
پاکستان نے دوسرے دن کی اپنی نامکمل اننگز کا آغاز 259 رنز 5 کھلاڑی آؤٹ سے کیا۔ سعود شکیل 42 اور آغا سلمان 10 رنز کے ساتھ کریز پر موجود تھے۔ دونوں کھلاڑیوں نے اسکور کو آگے بڑھایا، اور سعود شکیل نے اپنی ففٹی مکمل کی۔ تاہم، آغا سلمان 45 رنز بنا کر آؤٹ ہوگئے اور سعود شکیل 66 رنز کے ساتھ پویلین واپس لوٹ گئے۔
پاکستان کے بقیہ کھلاڑی شاہین آفریدی، ساجد خان اور آصف آفریدی بھی زیادہ دیر کریز پر نہ ٹک سکے، اور کیشوو مہاراج نے انہیں آؤٹ کر کے جنوبی افریقہ کی شاندار باؤلنگ کا مظاہرہ کیا۔ نعمان علی 6 رنز بنا کر ناٹ آؤٹ رہے۔
جنوبی افریقا کی طرف سے کیشوو مہاراج نے 7 کھلاڑیوں کو آؤٹ کیا، سائمن ہارمر نے 2 وکٹیں لیں اور ربادا ایک وکٹ کے ساتھ کامیاب رہے۔
پاکستان نے پہلے روز ٹاس جیت کر بیٹنگ کا فیصلہ کیا تھا۔ کپتان شان مسعود نے 87 اور عبداللہ شفیق نے 57 رنز بنائے، لیکن اس کے بعد ٹیم کی بیٹنگ لائن مشکلات کا شکار ہو گئی۔
یہ سیریز پاکستان کے لیے اہم ہے، کیونکہ انہوں نے لاہور میں کھیلے گئے پہلے ٹیسٹ میں جنوبی افریقا کو 93 رنز سے شکست دی تھی اور اب اس دوسرے میچ میں پاکستان 1-0 کی برتری کے ساتھ میدان میں اترا ہے۔