واشنگٹن: دنیا کی معروف انٹرنیٹ انفراسٹرکچر کمپنی کلاؤڈ فلیئر کو حال ہی میں بڑے پیمانے پر تکنیکی تعطل کا سامنا کرنا پڑا، جس کے نتیجے میں دنیا بھر میں کئی اہم ویب سائٹس وقتی طور پر بند یا سست ہو گئیں۔
رپورٹس کے مطابق، اس اچانک سروس تعطل سے خصوصاً برطانیہ میں لاکھوں صارفین متاثر ہوئے، جبکہ امریکہ اور دیگر ممالک میں بھی انٹرنیٹ خدمات میں رکاوٹیں دیکھنے کو ملیں۔
کلاؤڈ فلیئر عالمی سطح پر لاکھوں ویب سائٹس کو سیکیورٹی، ڈیٹا روٹنگ اور کارکردگی کی سہولیات فراہم کرتا ہے، اور کمپنی کے نیٹ ورک میں خرابی کے سبب بڑی آن لائن سروسز جیسے Microsoft، Outlook، اور Uber براہِ راست متاثر ہوئیں۔
صارفین نے ویب سائٹس تک رسائی میں ناکامی، ایرر میسجز، اور ای میل سروس کی معطلی سے متعلق متعدد شکایات درج کروائیں۔
ماہرین کا کہنا ہے کہ چونکہ کلاؤڈ فلیئر دنیا کی ویب ٹریفک کا ایک بڑا حصہ ہینڈل کرتا ہے، لہٰذا معمولی تکنیکی مسئلہ بھی وسیع پیمانے پر ڈیجیٹل نظام کو متاثر کر سکتا ہے۔ کمپنی نے صورتحال پر قابو پانے کے لیے فوری اقدامات کا آغاز کر دیا ہے۔