لیڈز : پاکستان کے خلاف ہیڈنگلے ٹیسٹ کے پہلے روز انگلینڈ کے فاسٹ بولرز اولی رابنسن اور جوش ٹنگ نے شاندار بولنگ کرتے ہوئے پانچ، پانچ وکٹیں حاصل کیں۔ دونوں کی اس عمدہ کارکردگی کے بعد میچ کی گیند کو یادگار کے طور پر رکھنے کے لیے ایک دلچسپ حل نکالا گیا۔
کرکٹ میں عام طور پر پانچ وکٹیں لینے والے بولر کو میچ میں استعمال ہونے والی گیند بطور یادگار دے دی جاتی ہے، لیکن اس بار ایک ہی اننگز میں دونوں انگلش بولرز نے یہ اعزاز حاصل کیا، جس کے باعث گیند کس کے حصے میں آئے گی، یہ سوال پیدا ہوگیا۔
جوش ٹنگ نے بتایا کہ اولی رابنسن نے مذاقاً یہ تجویز دی کہ گیند کو دو حصوں میں تقسیم کرلیا جائے۔ بعد ازاں ٹیم مینیجر وین بینٹلی نے گیند گراؤنڈ سٹاف کے حوالے کی، جہاں اسے مختصر وقت میں دو حصوں میں کاٹ دیا گیا۔
رابنسن کے مطابق دونوں بولرز نے میدان سے ڈریسنگ روم کی جانب واپسی کے دوران اس بارے میں بات کی تھی۔ گراؤنڈ سٹاف نے گیند کو تقسیم کیا اور یوں دونوں کھلاڑی اپنی پانچ وکٹوں کی یادگار اپنے ساتھ لے گئے۔
میچ میں جوش ٹنگ نے 46 رنز کے عوض پانچ وکٹیں حاصل کیں، جبکہ اولی رابنسن نے 51 رنز دے کر پانچ کھلاڑیوں کو آؤٹ کیا۔ دونوں کی تباہ کن بولنگ کے باعث پاکستان کی پوری ٹیم پہلی اننگز میں 171 رنز پر ڈھیر ہوگئی۔