تل ابیب :اسرائیل اور ایران کے درمیان جاری کشیدگی آج ایک نئے موڑ پر پہنچ گئی جب اسرائیلی افواج نے ایران کے نیم تعمیر شدہ آرک ہیوی واٹر ری ایکٹر کو نشانہ بنایا۔ اسرائیلی موقف کے مطابق اس حملے کا مقصد ایران کو ممکنہ طور پر پلوٹونیم کی تیاری اور جوہری ہتھیار سازی سے باز رکھنا تھا۔
یہ کارروائی ایک ایسے وقت پر سامنے آئی ہے جب ایران اور اسرائیل کے درمیان چھ روز سے شدید میزائل حملوں اور ڈرون وار کا تبادلہ جاری ہے۔ ایران نے اسرائیلی تنصیبات پر جوابی حملے کرتے ہوئے متعدد شہروں میں ہدف بنائے، جن میں سوروکا اسپتال پر حملہ قابلِ ذکر ہے۔
بین الاقوامی ادارے IAEA نے واضح کیا ہے کہ ری ایکٹر فی الحال غیر فعال تھا، جس سے جوہری رسک کا امکان کم ہو جاتا ہے، مگر اسرائیل کا یہ حملہ ایک واضح پیغام دے رہا ہے کہ وہ ایران کے جوہری عزائم کو کسی بھی قیمت پر روکنے کے لیے تیار ہے۔
عالمی طاقتیں، بالخصوص امریکا اور یورپی یونین، اس صورتحال کو مزید بگڑنے سے روکنے کے لیے سفارتی کوششیں تیز کر رہی ہیں، جبکہ عالمی منڈی میں تیل کی قیمتیں بھی غیر معمولی حد تک بڑھ گئی ہیں۔