کیلیفورنیا : گوگل نے نومبر 2025 میں جیمنائی 3 پرو متعارف کرایا تھا اور اب اس کا تیز رفتار ورژن جیمنائی 3 فلیش پیش کیا ہے۔ جیمنائی 3 فلیش خاص طور پر تیز کام کرنے کے لیے ڈیزائن کیا گیا ہے، اور گوگل کا کہنا ہے کہ یہ زیادہ تر کاموں کے لیے گوگل سرچ کے برابر تیز محسوس ہوتا ہے۔
اب جیمنائی ایپ میں جیمنائی 3 فلیش کو ڈیفالٹ ماڈل کے طور پر استعمال کیا جائے گا، جبکہ اگر آپ جیمنائی 3 پرو استعمال کر رہے ہیں تو آپ کو "تھنکنگ ماڈل" منتخب کرنا ہوگا جو زیادہ سوچنے اور پیچیدہ کاموں کے لیے بہتر ہے۔ گوگل کے مطابق، جیمنائی 3 پرو ابھی بھی ایڈوانس میتھ اور کوڈنگ جیسے معاملات کے لیے بہترین ہے، لیکن فلیش ماڈل باقی تمام کاموں کے لیے زیادہ تیز اور کارگر ثابت ہوگا۔
گوگل نے دعویٰ کیا ہے کہ جیمنائی 3 فلیش جیمنائی 2.5 فلیش سے کئی گنا بہتر ہے اور کچھ ٹیسٹس میں یہ اوپن اے آئی کے جی پی ٹی 5.2 کے برابر بھی ثابت ہوا ہے۔ اس کے علاوہ، گوگل نے جیمنائی 3 فلیش کو اپنی سرچ سروس میں بھی ڈیفالٹ اے آئی ماڈل کے طور پر شامل کر لیا ہے۔
گوگل کے مطابق، اس نئے اے آئی موڈ کی بدولت آپ پیچیدہ سوالات بھی پوچھ سکتے ہیں اور یہ ماڈل آپ کی ضروریات کو بہتر سمجھ کر آپ کو مناسب جوابات فراہم کرے گا۔