بیجنگ: دنیا کی مقبول ترین شارٹ ویڈیو شیئرنگ ایپ ٹک ٹاک نے صارفین کے اکاؤنٹس کو مزید محفوظ بنانے کے لیے ایک نیا "سیکیورٹی چیک اپ" ڈیش بورڈ متعارف کرایا ہے۔ اس ڈیش بورڈ کے ذریعے تمام سیکیورٹی فیچرز ایک ہی جگہ دستیاب ہوں گے، جس سے صارفین کو اکاؤنٹ سیکیورٹی کے مختلف آپشنز تک رسائی آسان ہو جائے گی۔
ٹک ٹاک کے جاری کردہ اعلامیے کے مطابق، اب صارفین کو اکاؤنٹ سیکیورٹی کے لیے مختلف آپشنز تلاش کرنے کی ضرورت نہیں پڑے گی، بلکہ وہ تمام ضروری فیچرز ایک ہی ڈیش بورڈ میں دیکھ اور استعمال کر سکیں گے۔
اکاؤنٹ کو فون نمبر، ای میل اور بائیو میٹرک کے ذریعے محفوظ بنانے کی سہولت۔ فیس لاک آپشن کے ذریعے اکاؤنٹ سیکیورٹی کو مزید بڑھایا جا سکے گا
ٹک ٹاک کے مطابق، یہ نیا فیچر صارفین کے اکاؤنٹس کو ہیکنگ اور غیر مجاز رسائی سے بچانے کے لیے ایک اہم قدم ثابت ہوگا۔ کمپنی کا کہنا ہے کہ یہ اقدام صارفین کی پرائیویسی اور سیکیورٹی کو بہتر بنانے کے لیے کیا گیا ہے۔
واضح رہے کہ گزشتہ ہفتے ٹک ٹاک نے والدین کے لیے نئے "پیرنٹل کنٹرول" فیچرز بھی متعارف کرائے تھے، جن کی مدد سے والدین اپنے کم عمر بچوں کے اکاؤنٹس پر مؤثر نگرانی کر سکتے ہیں۔
ٹک ٹاک کا یہ نیا سیکیورٹی فیچر صارفین کو ان کے اکاؤنٹس کی حفاظت کے حوالے سے زیادہ کنٹرول فراہم کرے گا اور انہیں غیر ضروری خطرات سے بچانے میں مددگار ثابت ہوگا۔