تہران: ایران نے اعلان کیا ہے کہ لبنان میں جنگ بندی کے بعد آبنائے ہرمز تجارتی بحری جہازوں کے لیے مکمل طور پر کھلا رہے گا، تاکہ خطے میں تجارتی سرگرمیاں اور عالمی بحری تجارت بغیر کسی رکاوٹ کے جاری رہ سکیں۔
ایران کے وزیر خارجہ عباس عراقچی نے سوشل میڈیا پر جاری بیان میں کہا کہ لبنان میں دس روزہ جنگ بندی کے بعد آبنائے ہرمز سے تمام تجارتی جہازوں کی آمد و رفت جنگ بندی کے دوران بلا کسی روک ٹوک ممکن ہوگی۔ انہوں نے کہا کہ یہ فیصلہ عالمی تجارتی روابط کے تسلسل کو یقینی بنانے کے لیے کیا گیا ہے۔
عباس عراقچی نے مزید وضاحت کی کہ جہازوں کی آمد و رفت اُس مربوط اور منظم راستے کے مطابق ہوگی جسے ایرانی پورٹس اینڈ میری ٹائم آرگنائزیشن نے پہلے ہی متعین کیا ہے، جو اسلامی جمہوریہ ایران کے تحت کام کرتی ہے اور پانی کے اس اہم راستے کے محفوظ اور منظم استعمال کو یقینی بناتی ہے۔
یہ اعلان اس کے چند گھنٹوں بعد سامنے آیا جب امریکی صدر ڈونلڈ ٹرمپ نے لبنان اور اسرائیل کے درمیان دس روزہ جنگ بندی کی تصدیق کی تھی۔ اس جنگ بندی کو خطے میں امن قائم کرنے اور تجارتی روابط برقرار رکھنے کے لیے اہم پیش رفت کے طور پر دیکھا جا رہا ہے۔
تجزیہ کاروں کا کہنا ہے کہ آبنائے ہرمز کے کھلے رہنے سے نہ صرف ایران بلکہ پورے خطے میں تجارتی جہازوں کی نقل و حرکت آسان ہوگی اور عالمی مارکیٹ میں توانائی و دیگر تجارتی سامان کی ترسیل میں رکاوٹیں کم ہوں گی۔ اس کے ساتھ ہی یہ قدم ایران کی جانب سے خطے میں استحکام قائم رکھنے اور بین الاقوامی تجارتی ذمہ داریوں میں اعتماد بڑھانے کی کوشش کے طور پر بھی دیکھا جا رہا ہے۔