نائب وزیراعظم اسحاق ڈار کا کوریائی قیادت سے رابطہ؛ جنوبی کوریا کی جانب سے پاکستان کے 'امن مشن' کی بھرپور تائید

انطالیہ : نائب وزیراعظم اور وزیر خارجہ اسحاق ڈار کی انطالیہ ڈپلومیسی فورم کے سائیڈ لائنز پر جنوبی کوریا کے نائب وزیر خارجہ برائے اسٹریٹجک انٹیلی جنس جیونگ یونڈو سے اہم ملاقات ہوئی ہے۔ اس ملاقات میں عالمی سطح پر پاکستان کے بڑھتے ہوئے سفارتی اثر و رسوخ اور بالخصوص ایران-امریکہ کشیدگی کم کرنے میں اسلام آباد کے کردار کو بھرپور طریقے سے سراہا گیا۔
ترجمان دفتر خارجہ کے مطابق، ملاقات کے دوران جنوبی کوریا کے نائب وزیر خارجہ نے خطے میں امن و استحکام کے لیے پاکستان کی مسلسل سفارتی کوششوں کا اعتراف کیا۔ انہوں نے کہا کہ     پاکستان نے حالیہ علاقائی بحرانوں کے دوران ایک ذمہ دار اور مخلص ثالث کا کردار ادا کیا ہے۔    جنوبی کوریا پاکستان کی ان کاوشوں کو قدر کی نگاہ سے دیکھتا ہے جنہوں نے خطے کو ایک بڑے تصادم سے بچانے میں مدد دی۔
نائب وزیراعظم اسحاق ڈار نے ملاقات میں باہمی دلچسپی کے امور اور حالیہ علاقائی صورتحال پر تفصیلی تبادلہ خیال کیا۔    انہوں نے واضح کیا کہ پاکستان کی خارجہ پالیسی کا محور 'سب کے لیے امن' ہے اور ہم معاشی خوشحالی کے لیے علاقائی استحکام کو ناگزیر سمجھتے ہیں۔    دونوں رہنماؤں نے پاک کوریا تجارتی تعلقات، آئی ٹی سیکٹر میں تعاون اور افرادی قوت کے تبادلے میں اضافے پر بھی اتفاق کیا۔