اسلام آباد: وفاقی حکومت نے اگلے 15 دنوں کے لیے پٹرولیم مصنوعات کی قیمتوں کو برقرار رکھنے کا فیصلہ کیا ہے۔ وزارت خزانہ کی جانب سے جاری کردہ نوٹیفکیشن کے مطابق، پٹرول، ہائی سپیڈ ڈیزل، مٹی کا تیل اور لائٹ ڈیزل کی قیمتیں بدستور جوں کی توں رہیں گی۔
نوٹیفکیشن کے مطابق، پٹرول کی قیمت 255 روپے 63 پیسے، ہائی سپیڈ ڈیزل 258 روپے 64 پیسے، مٹی کے تیل کی قیمت 168 روپے 12 پیسے اور لائٹ ڈیزل کی قیمت 153 روپے 34 پیسے برقرار رکھی گئی ہے۔
وزیراعظم شہباز شریف نے قیمتیں برقرار رکھنے کا اعلان کرتے ہوئے کہا کہ اس اقدام کا مقصد بجلی صارفین کو ریلیف فراہم کرنا ہے۔ مزید برآں، انہوں نے یہ بھی کہا کہ عوام کو جلد ہی بجلی کی قیمتوں میں بڑی کمی کا اعلان کیا جائے گا اور وہ اس حوالے سے قوم سے خطاب کریں گے۔