بیجنگ: چین نے اعلان کیا ہے کہ برطانیہ اور کینیڈا کے شہری اب چین کا سفر ویزے کے بغیر کر سکیں گے۔ چینی وزارتِ خارجہ کے مطابق یہ سہولت منگل سے شروع ہو کر 31 دسمبر تک برقرار رہے گی۔
یہ فیصلہ برطانوی وزیرِاعظم کیئر اسٹارمر اور کینیڈا کے وزیرِاعظم مارک کارنے کے حالیہ دورہ بیجنگ کے بعد کیا گیا۔ دونوں رہنماؤں نے چینی صدر ژی جن پنگ اور دیگر اعلیٰ حکام سے ملاقاتوں میں دوطرفہ تعلقات کو مزید مستحکم کرنے پر بات چیت کی تھی۔
چینی حکام کے مطابق، برطانیہ اور کینیڈا کے عام پاسپورٹ رکھنے والے افراد چین میں 30 دن تک بغیر ویزا رہ سکتے ہیں۔ یہ سہولت کاروبار، سیاحت، رشتہ داروں یا دوستوں سے ملاقات، تعلیمی تبادلہ یا ٹرانزٹ کے لیے دستیاب ہوگی۔ حکام کا کہنا ہے کہ اس اقدام کا مقصد عوامی سطح پر تعلقات کو بہتر بنانا ہے۔
دوسری جانب، چین کے وزیر خارجہ وانگ یی نے میونخ سیکیورٹی کانفرنس کے دوران جرمن چانسلر فریڈرک مرز سے ملاقات کی۔ چینی وزارتِ خارجہ کے مطابق، چین جرمنی کے ساتھ اپنے اسٹریٹجک تعلقات کو نئی بلندیاں دینے کا خواہاں ہے۔
ماہرین کے مطابق، چین یورپی یونین کے ساتھ اپنے روابط کو مزید مستحکم کرنے کی کوشش کر رہا ہے، خاص طور پر جب یورپ اپنی خارجہ پالیسی میں توازن لانے کی کوششوں میں ہے۔