پرتگال : کرسٹیانو رونالڈو نئے سیزن کی تیاری کے لیے النصر کے کیمپ میں واپس پہنچ گئے ہیں، جہاں ان کے نئے سنہری بالوں نے فٹبال سے زیادہ سوشل میڈیا پر دھوم مچا دی ہے۔
النصر کے پرتگالی کپتان نے اس بار اپنے روایتی ہیئر سٹائل سے ہٹ کر کاپر مائل سنہری رنگ اختیار کیا ہے۔ 40 سالہ سٹار کی نئی تصاویر سامنے آتے ہی سوشل میڈیا پر وائرل ہوگئیں اور مداحوں نے ان کے نئے روپ کو خوب سراہا۔
رونالڈو نے پرتگال کے عالمی کپ سفر کے اختتام کے بعد کچھ وقت اپنے ملک میں گزارا اور اب سعودی عرب واپس آکر النصر کے ساتھ نئے سیزن کی تیاریوں کا آغاز کردیا ہے۔ پرتگال کو 6 جولائی کو سپین کے خلاف شکست کا سامنا کرنا پڑا تھا۔
فٹبالر نے اپنی انسٹاگرام سٹوری پر ایک تصویر بھی شیئر کی، جس میں وہ سیاہ ٹی شرٹ، گلے میں چین اور ہاتھ میں گھڑی پہنے ہوئے دکھائی دیے۔ تاہم تصویر میں ان کا نیا سنہری ہیئر سٹائل سب سے نمایاں رہا۔
النصر 2026-27 کے سعودی پرو لیگ سیزن کے لیے تیاریوں میں مصروف ہے۔ ٹیم کا ابتدائی لیگ میچ 15 اگست کو الفتح کے خلاف شیڈول ہے، جبکہ 21 اگست کو النصر کا سامنا الریاض سے ہوگا۔
رونالڈو کی پہلے میچ میں شرکت تاحال حتمی نہیں۔ کلب کے نئے کوچ اینج پوسٹی کوگلو نے پرتگالی سٹار کی پیشہ ورانہ عادات اور کھیل کے لیے ہر وقت تیار رہنے کی صلاحیت کو سراہا ہے، تاہم ابتدائی میچ کے لیے حتمی فیصلہ بعد میں کیا جائے گا۔
رونالڈو کے لیے یہ سیزن خاص اہمیت رکھتا ہے کیونکہ یہ ان کے کلب کیریئر کا 25واں سیزن ہوگا۔ وہ اپنے کیریئر میں 1000 گول مکمل کرنے کے تاریخی ہدف کی جانب بڑھ رہے ہیں اور سعودی پرو لیگ میں ایک بار پھر گولڈن بوٹ حاصل کرنے کے خواہاں ہیں۔
نئے سیزن سے پہلے رونالڈو اپنی فٹنس پر بھی بھرپور توجہ دے رہے ہیں۔ سخت ٹریننگ اور بہتر ریکوری کے ساتھ وہ ایک مرتبہ پھر میدان میں اپنی بہترین کارکردگی دکھانے کے لیے تیار ہیں، جبکہ النصر بھی ان کی موجودگی سے بڑے نتائج کی امیدیں وابستہ کیے ہوئے ہے۔