اسلام آباد: دی اکانومسٹ کی ایک تازہ رپورٹ میں سابق وزیراعظم اور بانی پی ٹی آئی عمران خان کی سیاست میں توہماتی عناصر اور بشریٰ بی بی کے غیر منتخب مگر نمایاں اثرات کی نشاندہی کی گئی ہے۔ رپورٹ کے مطابق خان اہم سیاسی اور سرکاری فیصلوں سے قبل بشریٰ بی بی کی رائے لیتے رہے، جس میں کابینہ کے اراکین اور پارٹی کے دیگر رہنما بھی شامل تھے۔
سابق وزیراعظم کی ذاتی زندگی اور حکمرانی کے انداز پر بھی رپورٹ میں سوالات اٹھائے گئے ہیں۔ سابق گھریلو عملے کے مطابق روزانہ کے مخصوص رسوم اور دیگر توہماتی طریقے اختیار کیے جاتے تھے تاکہ مبینہ “برے اثرات” دور ہوں، جبکہ ریاستی امور میں بشریٰ بی بی کی مداخلت پارٹی کے ادارہ جاتی دعووں کے منافی تھی۔
رپورٹ میں یہ بھی بتایا گیا کہ پی ٹی آئی کے اہم سیاسی فیصلے خوابوں اور اندرونی سرگوشیوں کے تابع ہوتے تھے، نہ کہ شفاف ادارہ جاتی طریقے سے، جس سے پارٹی کے “ادارہ جاتی جمہوریت” کے دعوے پر سوال اٹھتے ہیں۔ علاوہ ازیں، عمران خان کی گرفتاری کے بعد پارٹی کارکنوں کی فوجی تنصیبات اور تاریخی مقامات پر حملوں کا ذکر بھی شامل ہے، جو تحریک کو ایسے گروہ کے طور پر دکھاتا ہے جو اداروں کے دائرہ کار کو عبور کرتا ہے۔