تہران : ایرانی پاسدارانِ انقلاب نے آپریشن وعدہ صادق کے تحت مشرقِ وسطیٰ میں امریکی اور اسرائیلی تنصیبات کو نشانہ بنایا ہے۔ ایران کے مطابق سعودی عرب میں امریکی فوجی اڈے اور لڑاکا طیاروں کے تربیتی مراکز پر میزائل حملے کیے گئے۔ یہ حملہ شہید ابو القاسم بابائیان اور ان کی زوجہ کی یاد میں کیا گیا۔
رپورٹس کے مطابق 28 فروری سے اب تک ایران میں 1444، لبنان میں 826، اور اسرائیل میں 14 افراد ہلاک ہو چکے ہیں۔ امریکی افواج کے 11 اہلکار مختلف ممالک میں مارے گئے، جبکہ یواے ای، سعودی عرب، عراق، کویت، عمان اور بحرین میں بھی ہلاکتیں ہوئیں۔
ایران نے متحدہ عرب امارات کے فجیرہ پورٹ پر ڈرون حملہ کیا، جس کے باعث آگ لگی اور آئل لوڈنگ عارضی طور پر بند ہو گئی۔ اسرائیل میں بھی متعدد دھماکے ہوئے اور آگ بھڑک اٹھی۔
ایرانی فوج نے امریکی فیکٹریوں اور اڈوں کے قریب شہریوں کو خبردار کیا اور کہا کہ وہ خطے سے دور رہیں۔ برطانیہ نے مشرقِ وسطیٰ میں ڈرون سسٹم بھیجنے پر غور شروع کر دیا ہے۔
عالمی سطح پر ایران کو امداد بھی مل رہی ہے: روس نے طبی سامان بھیجا اور چین نے سکول حملے سے متاثرہ خاندانوں کی مدد کا اعلان کیا۔
اس دوران، ایرانی فوج نے اسرائیلی حملے میں بریگیڈیئر جنرل عبداللہ جلالی کی شہادت کی تصدیق کی، جو دفاعی کارروائیوں کی قیادت کر رہے تھے۔