لاہور : نیشنل گرڈ کمپنی آف پاکستان (این جی سی) نے لاہور نارتھ گرڈ سٹیشن کو باضابطہ طور پر انرجائز کر دیا ہے، جو پاکستان کے توانائی کے شعبے میں ایک اہم پیش رفت ہے۔ 20.7 ارب روپے کی لاگت سے مکمل ہونے والے اس منصوبے میں ایشیائی ترقیاتی بینک (اے ڈی بی) کی مالی معاونت شامل تھی، جو اس کی تکمیل کے لیے اہم تھی۔
لاہور نارتھ گرڈ سٹیشن کی ٹرانسفارمیشن صلاحیت 500/220 کے وی سطح پر 3,000 ایم وی اے اور 220/132 کے وی سطح پر 750 ایم وی اے ہے۔ اس منصوبے میں 113 کلومیٹر طویل 500 کے وی اور 45 کلومیٹر طویل 220 کے وی ٹرانسمیشن لائنز شامل ہیں، جو مختلف اہم گرڈ سٹیشنز کو جوڑ کر ایک مضبوط نیٹ ورک تشکیل دیتی ہیں۔
یہ منصوبہ پاکستان کے توانائی کے نظام میں کئی اہم فوائد لائے گا، جن میں خاص طور پر سی پیک منصوبے کے تحت جنوبی پاکستان میں قائم ہونے والے کوئلے اور دیگر ذرائع سے چلنے والے پاور ہائوسز سے سستی بجلی کی مؤثر ترسیل شامل ہے۔ اس کے علاوہ، لاہور-مٹیاری (ایچ وی ڈی سی) ٹرانسمیشن لائن کی زیادہ سے زیادہ صلاحیت کا استعمال بھی ممکن ہوگا۔ اس سے لاہور، گوجرانوالہ اور اس کے ملحقہ علاقوں میں موجودہ گرڈ سٹیشنز پر لوڈ کم ہوگا، اور وولٹیج پروفائل میں بہتری کے نتیجے میں بجلی کی ترسیل زیادہ مؤثر ہوگی۔
لاہور نارتھ گرڈ سٹیشن زرعی، تجارتی، صنعتی اور گھریلو صارفین کی بجلی کی ضروریات پوری کرنے میں اہم کردار ادا کرے گا، جس سے علاقے کی معیشت کو مزید فروغ ملے گا۔
این جی سی کے منیجنگ ڈائریکٹر انجینئر الطاف حسین ملک نے اس کامیاب منصوبے کی تکمیل پر اپنی ٹیم کو سراہا اور اس میں شامل تمام افسران اور انجینئرز کی محنت، پیشہ ورانہ مہارت اور لگن کو خراج تحسین پیش کیا۔ یہ منصوبہ ڈپٹی منیجنگ ڈائریکٹر انجینئر رشید اے بھٹو اور جنرل مینیجر محمد شاہد نذیر کی نگرانی میں مکمل کیا گیا۔
لاہور نارتھ گرڈ سٹیشن پاکستان کے توانائی کے شعبے کے لیے ایک اہم سنگ میل ثابت ہوگا، جس سے ملک کی توانائی کی ضروریات کی تکمیل، انرجی سکیورٹی اور پائیدار ترقی کے فروغ میں مدد ملے گی۔