دوحہ :قطر کے دارالحکومت دوحہ میں آج عرب اور اسلامی ممالک کے وزرائے خارجہ کا اہم اجلاس ہوگا، جس میں پاکستان کے وزیر خارجہ سینیٹر اسحاق ڈار بھی شریک ہوں گے۔ یہ اجلاس کل ہونے والے ہنگامی عرب اسلامی سربراہی اجلاس کی تیاری کے لیے بلایا گیا ہے۔
قطر کی وزارت خارجہ کے مطابق، آج کے اجلاس میں اسرائیل کے حالیہ حملے کے خلاف ایک قرارداد پیش کی جائے گی۔ وزارت خارجہ کے ترجمان ماجد الانصاری نے کہا ہے کہ یہ اجلاس عرب اور اسلامی ممالک کی قطر کے ساتھ یکجہتی کو ظاہر کرتا ہے تاکہ اسرائیل کی جارحیت کا جواب دیا جا سکے۔
کل ہونے والے ہنگامی اجلاس میں پاکستان کے وزیراعظم شہباز شریف بھی شرکت کریں گے۔ سعودی وزیر خارجہ شہزادہ فیصل بن فرحان بھی دوحہ پہنچ چکے ہیں تاکہ اجلاس میں شریک ہوں۔
پاکستان کا کہنا ہے کہ وہ قطر کے ساتھ اپنے تعلقات کو بہت اہمیت دیتا ہے اور خطے میں اسرائیلی حملوں کی سخت مذمت کرتا ہے۔ یہ وزیراعظم شہباز شریف کا اس ہفتے قطر کا دوسرا دورہ ہوگا، جنہوں نے 11 ستمبر کو بھی قطر کا دورہ کیا تھا۔