واشنگٹن: امریکہ کی وفاقی اپیل عدالت نے افینیٹی کے سابق چیف ایگزیکٹو ضیا چشتی کی جانب سے دائر ہتکِ عزت کے مقدمے کی برخاستگی کے خلاف اپیل مسترد کرتے ہوئے ضلعی عدالت کا فیصلہ برقرار رکھا ہے۔امریکی عدالتِ اپیل برائے ڈسٹرکٹ آف کولمبیا سرکٹ نے قرار دیا کہ ستمبر 2024 میں ضلعی عدالت کی جانب سے مقدمہ مستقل طور پر خارج کرنے کا فیصلہ قانون کے مطابق تھا۔
یہ مقدمہ ضیا چشتی نے اپنی سابق ملازمہ تاتیانا سپاٹس ووڈ اور ان کے وکلا کے خلاف دائر کیا تھا۔ ان کا مؤقف تھا کہ 2021 میں امریکی ایوانِ نمائندگان کی جوڈیشری کمیٹی کے سامنے دی گئی گواہی، میڈیا انٹرویوز اور دیگر بیانات ہتکِ عزت پر مبنی تھے اور سابقہ ثالثی معاہدے کی رازداری کی خلاف ورزی کرتے تھے۔ عدالت نے دی ٹیلی گراف کے ساتھ ہونے والے تصفیے کو بھی مقدمے کے نتائج پر غیر متعلق قرار دیا۔
یہ تنازع 2019 کی ثالثی سے شروع ہوا تھا، جس میں تاتیانا سپاٹس ووڈ اپنے دعوؤں میں کامیاب رہی تھیں۔ بعد ازاں ان کی کانگریس میں گواہی امریکہ میں جنسی بدسلوکی اور لازمی ثالثی سے متعلق قانون سازی پر ہونے والی بحث کا حصہ بنی۔
تازہ فیصلے کے بعد ضیا چشتی کے ہتکِ عزت کے مقدمے کی برخاستگی برقرار رہے گی، البتہ وہ چاہیں تو اعلیٰ عدالت سے مزید نظرِ ثانی کی درخواست دے سکتے ہیں۔ اس طویل قانونی تنازع کا ایک اور باب اختتام کو پہنچ گیا ہے۔