بیجنگ: چین کے شہر گوانگژو میں قائم گوانگژو سی ٹی ایف فنانشل سینٹر جدید تعمیراتی فن کا شاہکار ہے، مگر اسے عالمی شہرت اس کی انتہائی تیز رفتار لفٹس نے دی ہے۔ یہ لفٹس دنیا میں اپنی تیز رفتاری کے لیے مشہور ہیں اور دیکھنے والوں کو حیرت میں مبتلا کر دیتی ہیں۔
2016 میں مکمل ہونے والی یہ عمارت 530 میٹر بلند ہے اور اس میں 111 فلورز اوپر زمین اور پانچ فلورز زیرِ زمین شامل ہیں۔ اگرچہ عمارت کی بلندی اور ڈیزائن خود میں متاثر کن ہیں، لیکن عوام کی توجہ کا مرکز وہ ایکسپریس لفٹس ہیں جو گراؤنڈ فلور سے 95ویں منزل صرف 43 سیکنڈ میں پہنچ جاتی ہیں۔
یہ لفٹس جاپانی کمپنی ہٹاچی کی تنصیب کردہ ہیں۔ عمارت میں کل 95 لفٹس ہیں، جن میں ڈبل ڈیکر، تیز رفتار اور درمیانی رفتار والی لفٹس شامل ہیں۔ خاص طور پر دو لفٹس کو عالمی شہرت حاصل ہے جنہوں نے رفتار کا ریکارڈ قائم کیا۔
یہ لفٹس 1200 میٹر فی منٹ کی رفتار سے حرکت کرتی ہیں، یعنی تقریباً 72 کلومیٹر فی گھنٹہ، اور اس ریکارڈ سے پہلے یہ اعزاز تائی پے 101 کو حاصل تھا۔
اتنی تیز رفتاری کے باوجود مسافروں کی حفاظت اولین ترجیح رہی۔ اس مقصد کے لیے جدید مقناطیسی موٹرز، ہلکی ٹریکشن مشینیں اور ایرو ڈائنامک کیبن ڈیزائن استعمال کی گئی ہیں۔ ہنگامی صورتحال میں بریکنگ سسٹم اتنا مضبوط ہے کہ اچانک رُکنے پر پیدا ہونے والی تقریباً 300 ڈگری سینٹی گریڈ حرارت بھی برداشت کر لیتا ہے۔
علاوہ ازیں، ایکٹیو گائیڈ رولرز کیبن کی معمولی لرزش کو فوراً محسوس کر کے اسے کم کرتے ہیں اور پریشرائزڈ کیبن اندرونی ہوا کے دباؤ کو بتدریج ایڈجسٹ کرتی ہے، تاکہ مسافر آرام دہ اور محفوظ سفر کا لطف اٹھا سکیں۔
یہ عمارت اور اس کی برق رفتار لفٹس جدید انجینئرنگ کا ثبوت ہیں جہاں رفتار، تحفظ اور آرام ایک ساتھ ممکن بنائے گئے ہیں۔