لاہور : وزیراعلیٰ پنجاب مریم نواز شریف نے ویڈیو لنک کے ذریعے منعقدہ اجلاس کی صدارت کی، جس میں صوبے میں ڈیجیٹلائزیشن کے مختلف منصوبوں، سرکاری اداروں کی جدید نظام سے منسلکی اور عوام کو ٹیکنالوجی کے ذریعے خدمات کی فراہمی کا جائزہ لیا گیا۔
اجلاس کے شرکا کو بتایا گیا کہ پنجاب انفارمیشن ٹیکنالوجی بورڈ کے مرکزی پلیٹ فارم سے اب تک 6 ہزار سے زیادہ سرکاری سسٹمز کو جوڑا جاچکا ہے۔ اس اقدام کا مقصد مختلف محکموں کے درمیان معلومات اور سرکاری امور کے تبادلے کو زیادہ تیز اور مؤثر بنانا ہے۔
حکام کے مطابق ای فائلنگ اینڈ آفس آٹومیشن سسٹم (ای-فواس) کے ذریعے تقریباً 600 سرکاری و متعلقہ ادارے ڈیجیٹل طور پر منسلک ہوچکے ہیں۔ اس نظام کی مدد سے دفتری فائلنگ اور انتظامی معاملات کو روایتی طریقہ کار کے بجائے آن لائن نظام کے تحت انجام دینے کی سہولت حاصل ہوئی ہے۔
اجلاس کے دوران ’مریم کی دستک‘ منصوبے کی کارکردگی بھی پیش کی گئی۔ بریفنگ میں بتایا گیا کہ پروگرام کے ذریعے اب تک 40 لاکھ سے زائد شہری مختلف حکومتی سہولیات کے لیے درخواستیں دے چکے ہیں۔
حکام نے مزید بتایا کہ پروگرام کے تحت 31 لاکھ سے زیادہ شہریوں کو سرکاری خدمات ان کے گھروں پر فراہم کی جاچکی ہیں، جس سے عوام کو مختلف سرکاری دفاتر میں جانے کی ضرورت کم ہوئی ہے۔
اجلاس میں پنجاب کے ڈیجیٹل تبدیلی کے ایجنڈے کو مزید آگے بڑھانے، سرکاری اداروں کے درمیان ڈیجیٹل رابطہ مضبوط کرنے اور شہریوں کے لیے خدمات کے حصول کو مزید آسان بنانے سے متعلق امور بھی زیرِ غور آئے۔
وزیراعلیٰ مریم نواز نے سرکاری نظام میں جدید ٹیکنالوجی کے مؤثر استعمال اور عوام کو سہولیات ان کی دہلیز تک پہنچانے کے عمل کو مزید بہتر بنانے کی ضرورت پر زور دیا۔