سپین : برطانیہ اور یورپ کے مختلف علاقوں میں گزشتہ روز نظر آنے والے سورج گرہن نے جہاں عام لوگوں کی توجہ حاصل کی، وہیں مختلف کھیلوں کے مقابلوں کے دوران بھی شائقین اس قدرتی مظہر سے لطف اندوز ہوتے دکھائی دیے۔
1999 کے بعد خطے میں نمایاں ترین سورج گرہن کے دوران اسپین اور آئس لینڈ کے بعض علاقوں میں مکمل گرہن دیکھنے کو ملا، جبکہ برطانیہ کے کئی حصوں میں چاند نے سورج کا 90 فیصد سے زیادہ حصہ ڈھانپ لیا۔
گرہن کے وقت مختلف کھیلوں کے مقابلے جاری تھے، جس کے باعث اسٹیڈیمز میں موجود شائقین کو کھیل کے ساتھ آسمان کا منفرد نظارہ بھی دیکھنے کا موقع ملا۔ برمنگھم میں یورپی ایتھلیٹکس چیمپئن شپ، دی ہنڈریڈ کے کرکٹ میچ اور آسٹریا میں ایسٹن ولا اور پیرس سینٹ جرمین کے سپر کپ مقابلے کے دوران تماشائیوں نے سورج گرہن کا مشاہدہ کیا۔
قدرتی روشنی میں اچانک کمی کے باعث کھیلوں کے مقامات کا ماحول بھی کچھ دیر کے لیے بدل گیا اور شائقین کی بڑی تعداد نے مقابلوں سے توجہ ہٹا کر آسمان کی جانب نظریں جما لیں۔
ماہرین نے سورج کو براہِ راست دیکھنے سے خبردار کرتے ہوئے حفاظتی چشموں کے استعمال پر زور دیا تھا۔ تاہم کچھ شائقین نے مناسب حفاظتی چشمے نہ ہونے کی صورت میں گرہن دیکھنے کے لیے متبادل اور گھریلو طریقے بھی استعمال کیے۔