غزہ: حماس کے اعلیٰ رہنما اسامہ حمدان نے اعلان کیا ہے کہ غزہ میں موجود یرغمالیوں کی رہائی کا عمل کل صبح شروع ہو جائے گا، اور یہ تبادلہ صدر ڈونلڈ ٹرمپ کی قیادت میں ہونے والی بین الاقوامی کانفرنس سے پہلے مکمل کر لیا جائے گا۔ اس معاہدے کے تحت، ابتدا میں 20 یرغمالیوں کو رہا کیا جائے گا جن کے بارے میں اسرائیل کا کہنا ہے کہ وہ زندہ ہیں، اور ان کے بدلے 2000 فلسطینی قیدیوں کو آزاد کیا جائے گا۔
مصر کے صدارتی دفتر نے بھی اس بات کی تصدیق کی ہے کہ امریکی صدر ٹرمپ اور مصری صدر عبدالفتاح السیسی پیر کی سہ پہر شرم الشیخ میں ایک اہم اجلاس کی قیادت کریں گے، جس میں 20 سے زائد ممالک کے نمائندے شرکت کریں گے۔ اس اجلاس کا مقصد غزہ میں جنگ کا خاتمہ، مشرق وسطیٰ میں امن قائم کرنا اور خطے میں نئے استحکام کے دور کا آغاز کرنا ہے۔
اس اجلاس میں اقوامِ متحدہ کے سیکرٹری جنرل انتونیو گوتریس، برطانوی وزیراعظم کیئر سٹارمر، اٹلی اور اسپین کے وزرائے اعظم، اور فرانسیسی صدر ایمانوئل میکخواں بھی شریک ہوں گے۔ تاہم، ابھی تک یہ واضح نہیں کہ اسرائیلی وزیراعظم بنیامین نیتن یاہو اس اجلاس میں شریک ہوں گے یا نہیں۔
حماس کے سیاسی بیورو کے رکن حسام بدران نے کہا ہے کہ حماس اس اجلاس میں شرکت نہیں کرے گی کیونکہ وہ اس پورے عمل میں قطر اور مصر کی ثالثی کو تسلیم کرتے ہوئے شریک ہو چکی ہے۔ بدران نے یہ بھی کہا کہ حالیہ معاہدے کے باوجود غزہ کی طویل المدتی سیاسی صورتحال اور حماس کی مسلح سرگرمیوں کو ختم کرنا ایک مشکل چیلنج ہوگا۔