اسلام آباد : صدر مملکت آصف علی زرداری اور وزیراعظم شہباز شریف نے چائلڈ لیبر کے خاتمے کے لیے مل کر کام کرنے کی ضرورت پر زور دیا ہے۔ چائلڈ لیبر کے عالمی دن کے موقع پر دونوں رہنماؤں نے کہا کہ بچوں کو محنت اور استحصال سے بچانا ہم سب کی مشترکہ ذمہ داری ہے۔
صدر آصف علی زرداری نے کہا کہ یہ مسئلہ صرف پاکستان کا نہیں بلکہ پوری دنیا کا ہے اور اس کا حل بھی عالمی تعاون سے ہی ممکن ہے۔ انہوں نے بتایا کہ حکومت نے چائلڈ لیبر روکنے کے لیے قوانین بنائے ہیں اور متاثرہ بچوں کی مدد کے لیے نظام بھی قائم کیا ہے۔ انہوں نے آجران سے کہا کہ وہ قوانین کی سختی سے پابندی کریں اور اپنے کام کی جگہوں پر بچوں کے استحصال کی ہر صورت روک تھام کریں۔
صدر نے والدین سے بھی اپیل کی کہ وہ فوری مالی فائدے کی بجائے اپنے بچوں کی تعلیم کو ترجیح دیں، اور اساتذہ و تعلیمی اداروں کو کہا کہ وہ ایسے بچوں کو پہچانیں جو سکول چھوڑنے کے خطرے میں ہوں۔ انہوں نے میڈیا اور سول سوسائٹی سے بھی کہا کہ وہ ضرورت مند خاندانوں کی مدد کریں تاکہ کوئی بچہ غربت کی وجہ سے مزدوری پر مجبور نہ ہو۔
وزیراعظم شہباز شریف نے کہا کہ پاکستان دنیا کے ساتھ مل کر بچوں کی محنت کے خلاف جدوجہد کر رہا ہے اور اس مسئلے کو ختم کرنے کے لیے کوششیں تیز کرنے کی ضرورت ہے۔ انہوں نے بتایا کہ چائلڈ لیبر کا شکار بچے نہ صرف جسمانی اور ذہنی تکلیف میں مبتلا ہوتے ہیں بلکہ اپنی تعلیم اور بچپن سے بھی محروم ہو جاتے ہیں۔
وزیراعظم نے اپنے اور حکومت کے عزم کا اعادہ کیا کہ وہ چائلڈ لیبر کے خاتمے کے لیے بھرپور اقدامات کریں گے تاکہ ہر بچہ محفوظ اور تعلیم یافتہ زندگی گزار سکے۔