اسلام آباد: وزیر مملکت برائے داخلہ طلال چودھری نے راولپنڈی کے مال روڈ پر پیش آنے والے فائرنگ کے واقعے پر کہا ہے کہ سکیورٹی فورسز پر براہ راست فائرنگ کرکے ایک اہلکار کو زخمی کرنا انتہائی افسوسناک اور تشویشناک واقعہ ہے۔
اسلام آباد میں نیوز کانفرنس کرتے ہوئے طلال چودھری نے کہا کہ فائرنگ کرنے والے سیاسی کارکن نے سکیورٹی فورسز کو براہ راست نشانہ بنایا، جس پر اہلکاروں نے اپنے دفاع میں جوابی کارروائی کی۔ انہوں نے کہا کہ قانون نافذ کرنے والے اہلکاروں پر حملہ کسی صورت قابل قبول نہیں۔
وزیر مملکت نے سوال کیا کہ سیاسی کارکنوں کو اس طرح کے اقدامات کی تربیت کون دے رہا ہے اور ان کے ذہنوں میں نفرت اور انتشار کون پیدا کر رہا ہے۔ انہوں نے کہا کہ پی ٹی آئی قیادت صرف یہ کہہ کر اپنی ذمہ داری سے بری الذمہ نہیں ہوسکتی کہ فائرنگ کرنے والے نوجوان سے ان کا کوئی تعلق نہیں۔
طلال چودھری نے کہا کہ اگر نوجوان کا ذہنی توازن درست نہیں تھا تو یہ بھی سوال ہے کہ اس نے سکیورٹی فورسز کو ہی کیوں نشانہ بنایا۔ ان کا کہنا تھا کہ پی ٹی آئی سے بارہا اپیل کی گئی ہے کہ نوجوانوں کے ذہنوں میں نفرت، اشتعال اور انتشار نہ بھرا جائے۔
انہوں نے کہا کہ سیاسی اختلافات جمہوری عمل کا حصہ ہیں، تاہم اختلاف رائے کو تشدد اور قانون شکنی میں تبدیل نہیں ہونا چاہیے۔ ریاستی اداروں اور سکیورٹی اہلکاروں پر حملوں کی روک تھام کے لیے قانون کے مطابق کارروائی ضروری ہے۔