لندن : معروف برطانوی اخبار فنانشل ٹائمز نے اپنی رپورٹ میں کہا ہے کہ پاکستان اور امریکا کے درمیان بڑھتی ہوئی قربت نے بھارت کی پریشانی میں اضافہ کر دیا ہے۔
یہ بہتری حالیہ مہینوں میں پاکستان اور سابق امریکی صدر ڈونلڈ ٹرمپ کے درمیان ہونے والے اہم رابطوں کے بعد سامنے آئی ہے۔ رپورٹ کے مطابق پاکستان کے فیلڈ مارشل جنرل عاصم منیر نے اس سال دو بار امریکا کا دورہ کیا، جہاں انہوں نے اہم امریکی عسکری قیادت سے ملاقاتیں کیں، اور ریٹائر ہونے والے جنرل مائیکل کوریلا کی تقریب میں بھی شرکت کی۔
اس سے بھی زیادہ اہم بات یہ ہے کہ جون میں جنرل عاصم منیر نے ڈونلڈ ٹرمپ کے ساتھ دو گھنٹے پر مشتمل نجی ملاقات کی، جو پاکستان اور بھارت کے درمیان کشیدگی کے فوراً بعد ہوئی۔ یہ ایک بڑی تبدیلی سمجھی جا رہی ہے، کیونکہ ٹرمپ ماضی میں پاکستان پر سخت تنقید کرتے رہے ہیں۔
ایشیا پیسیفک فاؤنڈیشن کے ماہر مائیکل کوگلمین کا کہنا ہے کہ پاکستان نے بہت چالاکی سے ٹرمپ جیسے غیر روایتی سیاستدان کے ساتھ تعلقات بنانے کا طریقہ سیکھ لیا ہے۔
فنانشل ٹائمز کے مطابق پاکستان نے یہ کامیابی ایک جامع حکمت عملی کے ذریعے حاصل کی، جس میں دہشتگردی کے خلاف تعاون، ٹرمپ کے کاروباری نیٹ ورک سے روابط، اور توانائی، معدنیات و کرپٹو جیسے شعبوں میں معاہدے شامل ہیں۔