کیلیفورنیا: واٹس ایپ ویب میں نیا اور اہم فیچر متعارف کرانے کی تیاری، چیٹ تھیمز کو ذاتی پسند کے مطابق بدلنے کا امکان
میسجنگ پلیٹ فارم واٹس ایپ اپنے ویب ورژن کے لیے ایک اور بڑی اپ ڈیٹ پر کام کر رہا ہے، جس کے تحت صارفین کو چیٹس کی شکل و صورت اپنی مرضی کے مطابق تبدیل کرنے کی سہولت مل سکے گی۔
ٹیکنالوجی رپورٹس کے مطابق ویب سائٹ WABetaInfo نے بتایا ہے کہ واٹس ایپ ویب میں “کسٹم چیٹ تھیمز” فیچر کی آزمائش جاری ہے۔ اگرچہ یہ فیچر ابھی مکمل طور پر تیار نہیں ہوا، لیکن اس سے واضح ہوتا ہے کہ کمپنی ویب ورژن کو زیادہ جدید اور انٹریکٹو بنانے کی سمت بڑھ رہی ہے۔
نئے فیچر کے ذریعے صارفین چیٹ ببلز کے رنگ، وال پیپر اور بیک گراؤنڈ کو آسانی سے تبدیل کر سکیں گے، اور یہ تمام تبدیلیاں براہ راست ویب براؤزر کے اندر دستیاب ہوں گی۔ اس کے لیے واٹس ایپ ویب کی سیٹنگز میں ایک نیا “چیٹ تھیم” سیکشن شامل کیا جائے گا۔
مزید بتایا گیا ہے کہ صارفین کو یہ سہولت بھی مل سکتی ہے کہ وہ ہر چیٹ کے لیے الگ تھیم منتخب کر سکیں، جس سے ہر گفتگو کو منفرد انداز میں ترتیب دیا جا سکے گا۔
رپورٹس کے مطابق واٹس ایپ کی جانب سے 40 سے 50 مختلف تھیمز پر کام کیا جا رہا ہے، اور یہ تمام تھیمز صرف صارف کے اکاؤنٹ تک محدود رہیں گی، یعنی دوسرے افراد کو ان تبدیلیوں کا علم نہیں ہوگا۔
فی الحال اس فیچر کی حتمی تاریخ کا اعلان نہیں کیا گیا، تاہم امکان ہے کہ اسے آنے والے وقت میں باقاعدہ طور پر متعارف کرا دیا جائے گا۔