برازیل کی جرسی میں بلاول بھٹو کا  ویڈیو پیغام، کراچی والوں کو 'منی برازیل' آنے کی دعوت

کراچی: پاکستان پیپلز پارٹی کے چیئرمین بلاول بھٹو زرداری برازیل فٹبال ٹیم کی روایتی زرد جرسی پہن کر فٹبال کے رنگ میں رنگ گئے، انہوں نے کراچی کے شہریوں کے لیے فیفا ورلڈ کپ کا میلہ لیاری میں سجانے کا بڑا اعلان کر دیا ہے۔
 اپنے ایک منفرد ویڈیو پیغام میں بلاول بھٹو زرداری نے خود کو فٹبال کا مداح ظاہر کرتے ہوئے کراچی کے تمام فٹبال متوالوں کو لیاری کے انٹرنیشنل سٹیڈیم آنے کی دعوت دی ہے۔ انہوں نے کہا کہ عالمی کپ کے تمام میچز بڑے سکرین پر لائیو دیکھنے کے لیے اس سے بہتر اور پرجوش جگہ کوئی نہیں ہو سکتی۔
فٹبال کے عالمی کپ کے موقع پر پاکستان پیپلز پارٹی کی جانب سے کراچی کے شہریوں کے لیے خصوصی انتظامات کیے گئے ہیں۔     لیاری کے انٹرنیشنل فٹبال اسٹیڈیم میں ایک بہت بڑی (دیوہیکل) اسکرین نصب کی گئی ہے جہاں ٹورنامنٹ کے تمام میچز لائیو دکھائے جائیں گے۔
 لیاری کے علاوہ ملیر کے علاقے صدیق گوٹھ، کلری کے علی محمد محلہ اور سیفی لین سمیت شہر کے مختلف مقامات پر بھی بڑی اسکرینیں لگائی گئی ہیں تاکہ عوام اپنے پسندیدہ کھیل کا بھرپور لطف اٹھا سکیں۔