اسلام آباد: وزیراعظم شہباز شریف نے صوبائی حکومتوں کو ہدایت کی ہے کہ ’’اپنا گھر اسکیم‘‘ کے تحت ضلعی سطح پر خصوصی سہولت ڈیسک قائم کیے جائیں تاکہ شہریوں کو زمین سے متعلق دستاویزات کے حصول میں آسانی میسر آ سکے۔
اسلام آباد میں اسکیم کے جائزہ اجلاس کی صدارت کرتے ہوئے وزیراعظم نے عوام کی جانب سے اس پروگرام کو ملنے والے مثبت ردعمل پر اطمینان کا اظہار کیا۔
انہوں نے کہا کہ اگر موجودہ رفتار برقرار رہی تو بڑی تعداد میں خاندانوں کو جلد اپنے گھر کا خواب پورا ہوتا نظر آئے گا۔
شہباز شریف نے کہا کہ اس اسکیم کی کامیابی سے تعمیراتی شعبے میں سرگرمی بڑھے گی، اس سے منسلک صنعتوں کو فروغ ملے گا اور مجموعی معاشی ترقی میں بھی اضافہ ہوگا۔
انہوں نے متعلقہ اداروں کو ہدایت کی کہ درخواست دہندگان کے لیے مزید سہولیات فراہم کی جائیں اور پورے عمل کو زیادہ آسان اور شفاف بنایا جائے۔
وزیراعظم نے وزارتِ ہاؤسنگ کو اسٹیٹ بینک آف پاکستان کے ساتھ مل کر درخواست فارم کو مزید سادہ اور عام فہم بنانے کی بھی ہدایت دی۔
انہوں نے بینکوں کو تاکید کی کہ اہل درخواستوں کی منظوری کے عمل کو تیز کیا جائے تاکہ شہریوں کو بروقت مالی سہولت حاصل ہو سکے۔
وزیراعظم نے ملک بھر میں اس اسکیم سے متعلق آگاہی مہم کو مزید تیز اور مؤثر بنانے کی بھی ہدایت کی۔
اجلاس میں بتایا گیا کہ ’’اپنا گھر اسکیم‘‘ کے تحت اب تک 11 ارب روپے سے زائد کے قرضے تقسیم کیے جا چکے ہیں۔
ملک بھر سے 67 ہزار 900 درخواستیں موصول ہوئی ہیں جن میں سے 16 ہزار 587 کی منظوری دی جا چکی ہے جبکہ 3 ہزار 146 افراد کو قرضے جاری کیے جا چکے ہیں۔
مزید بتایا گیا کہ اسٹیٹ بینک آف پاکستان نے تمام بینکوں کو ہدایت دی ہے کہ وہ درخواستوں کا عمل 15 دن کے اندر مکمل کریں۔