غزہ : اسرائیل نے مقبوضہ مغربی کنارے کی تین بستیوں میں 764 نئے رہائشی یونٹس کی تعمیر کی حتمی منظوری دے دی ہے، جس پر فلسطینی اتھارٹی نے سخت ردعمل ظاہر کرتے ہوئے اسے خطے میں امن کی کوششوں کے لیے ایک بڑی رکاوٹ قرار دیا ہے۔ فلسطینی رہنماؤں کا کہنا ہے کہ اسرائیل کی یہ آبادکاری فلسطینی ریاست کے قیام کی راہ میں حائل ہے۔
اسرائیلی وزیر خزانہ بیزالیل سموتریچ، جو فلسطینی ریاست کے قیام کے مخالف ہیں، نے اس بات کا اعتراف کیا ہے کہ ان کے عہدہ سنبھالنے کے بعد سے مغربی کنارے میں 51 ہزار 370 نئے رہائشی یونٹس کی منظوری دی جا چکی ہے۔ سموتریچ نے کہا کہ اسرائیلی حکومت کا یہ اقدام اس کے مفاد میں ہے۔
یاد رہے کہ یہ وہ علاقے ہیں جنہیں فلسطینی اپنی آئندہ ریاست کا حصہ بنانا چاہتے ہیں۔ فلسطینی اتھارٹی نے عالمی برادری اور خاص طور پر امریکی حکومت سے مطالبہ کیا ہے کہ وہ اسرائیل پر دباؤ ڈالے تاکہ یہ آبادکاری کی پالیسیوں کو روکا جا سکے۔
فلسطینی صدر کے ترجمان نبیل ابو ردینہ نے کہا کہ امریکہ کو اسرائیل پر دباؤ ڈالنا چاہیے تاکہ وہ فلسطینی زمین کے قبضے، آبادکاری اور توسیع کی کوششوں کو روکے اور بین الاقوامی قوانین کا احترام کرے۔ یہ نئے رہائشی یونٹس ہشمو ناعیم، گیوَت زیو اور بیتار علیت میں تعمیر کیے جائیں گے۔
دنیا کی بیشتر طاقتیں اسرائیل کی ان آبادکاریوں کو غیر قانونی سمجھتی ہیں، اور اقوام متحدہ کی کئی قراردادیں اسرائیل سے ان آبادکاریوں کو روکنے کا مطالبہ کرتی ہیں۔ فلسطین لبریشن آرگنائزیشن کے رکن واصل ابو یوسف نے بھی کہا کہ ان آبادکاریوں کا مقصد فلسطینی علاقوں کی جغرافیائی حقیقت کو تبدیل کرنا ہے، اور یہ بین الاقوامی قوانین کے خلاف ہیں۔
اسرائیل کی جانب سے آبادکاری کی اس نئی لہر کے باوجود، جنگ بندی کے دوران اسرائیلی فوج کی خلاف ورزیاں جاری ہیں۔ تازہ اطلاعات کے مطابق، گزشتہ 24 گھنٹوں میں مزید 3 فلسطینی شہری شہید اور 5 زخمی ہوئے ہیں۔ اسرائیلی فوج نے جنگ بندی معاہدے کی 738 بار خلاف ورزی کی ہے، جس کے نتیجے میں 379 فلسطینی شہید اور ایک ہزار سے زائد زخمی ہوئے ہیں۔ فلسطینی شہداء کی مجموعی تعداد 70,366 تک پہنچ چکی ہے، جب کہ زخمیوں کی تعداد 171,064 ہو چکی ہے۔
اسی دوران، قدرتی آفات جیسے طوفان بائرن اور سیلاب کے خطرات بھی فلسطینی عوام کے لیے مزید مشکلات کا سبب بن رہے ہیں، جو پہلے ہی بے یار و مددگار اور کھلے آسمان تلے زندگی گزار رہے ہیں۔