کیلیفورنیا:دنیا بھر میں 2 ارب سے زائد صارفین کے ساتھ واٹس ایپ کو دنیا کا سب سے بڑا میسجنگ پلیٹ فارم قرار دیا جاتا ہے۔ اپنی مقبولیت کو برقرار رکھنے کے لیے واٹس ایپ اپنی ایپ میں اکثر نئے فیچرز متعارف کراتا ہے۔ حالیہ ہفتوں میں میٹا کی زیر ملکیت ایپ میں کچھ دلچسپ اور فائدہ مند فیچرز کا اضافہ کیا گیا ہے، جو صارفین کے تجربے کو مزید بہتر بناتے ہیں۔
یہ فیچر خاموشی سے واٹس ایپ میں شامل کیا گیا ہے، جس کے ذریعے گروپ چیٹس میں شامل افراد کی آن لائن ہونے کی تعداد کا علم ہوتا ہے۔ تاہم، ایپ کی طرف سے یہ نہیں بتایا جاتا کہ آپ کے کون سے دوست آن لائن ہیں، بلکہ صرف آن لائن افراد کی تعداد گروپ کے نام کے نیچے دکھائی جاتی ہے۔
زیادہ تر افراد متعدد گروپ چیٹس کا حصہ ہوتے ہیں، جس کے نتیجے میں انہیں مسلسل نوٹیفکیشنز موصول ہوتی ہیں۔ واٹس ایپ کے نئے فیچر کے ذریعے صارفین کو اب صرف اہم نوٹیفکیشنز پر توجہ مرکوز کرنے میں مدد ملے گی۔ اس کے لیے "نوٹیفائی فار" سیٹنگ کا استعمال کیا جا سکتا ہے، جس میں آپ میسجز کے جوابات، محفوظ کانٹیکٹس کے میسجز اور مینشنڈ پیغامات تک محدود نوٹیفکیشنز حاصل کر سکتے ہیں۔
واٹس ایپ نے گروپ ایونٹس کا آپشن تو پہلے ہی فراہم کیا تھا، مگر اب آپ ون آن ون چیٹس میں بھی ایونٹس ترتیب دے سکتے ہیں۔ اس فیچر کے ذریعے آپ دیگر افراد کو انوائیٹ کر سکتے ہیں، ایونٹ کی تاریخ اور وقت سیٹ کر سکتے ہیں اور اس ایونٹ کو چیٹ میں پن بھی کر سکتے ہیں۔
آئی فون صارفین کے لیے واٹس ایپ میں دستاویزات کو اسکین کرنے کا فیچر متعارف کرایا گیا ہے، جس کی بدولت اب آپ کو کسی تھرڈ پارٹی ایپ کی ضرورت نہیں۔ یہ فیچر آپ کو اٹیچمنٹ ٹرے میں موجود "اسکین ڈاکومنٹ" آپشن سے دستاویزات کو آسانی سے اسکین کرنے کی سہولت فراہم کرتا ہے۔
یہ فیچر بھی صرف آئی فون صارفین کے لیے دستیاب ہے، جس میں آپ ویڈیو کالز کے دوران زوم ان کر سکتے ہیں۔ اس فیچر کی مدد سے آپ ویوئنگ ایکسپیرئنس کو بہتر بنا سکتے ہیں اور کال کے دوران مزید تفصیل سے کسی چیز کو دیکھ سکتے ہیں۔
واٹس ایپ چینلز کے مالکان اب کیو آر کوڈز شیئر کر سکتے ہیں، جو چینلز کے لنکس کے طور پر کام کرتے ہیں۔ اس فیچر سے چینل کو نئے صارفین تک پہنچانا اور اشتراک کرنا آسان ہو جائے گا۔