تل ابیب : عالمی دباؤ کے بڑھتے ہوئے اثرات کے نتیجے میں اسرائیل نے اعلان کیا ہے کہ وہ اردن کے ساتھ واقع ایلینبی کراسنگ کو غزہ کے لیے انسانی امداد اور تجارتی سامان کی ترسیل کے لیے دوبارہ کھول رہا ہے۔ یہ کراسنگ 23 ستمبر سے بند تھی، لیکن اب اسے آج سے کھولا جا رہا ہے تاکہ امدادی سامان کی ترسیل ممکن ہو سکے۔
اسرائیلی حکام کے مطابق، کراسنگ کے کھلنے کے بعد کارگو ٹرکوں اور ڈرائیورز کی سخت سکریننگ کی جائے گی اور سکیورٹی بڑھا دی جائے گی تاکہ کسی بھی ممکنہ خطرے کا مقابلہ کیا جا سکے۔ اضافی سکیورٹی اہلکار بھی تعینات کیے گئے ہیں تاکہ علاقے میں امن برقرار رکھا جا سکے۔
دوسری جانب فلسطینی مزاحمتی گروہ حماس نے اسرائیل کو خبردار کیا ہے کہ اگر جنگ بندی کی خلاف ورزیاں جاری رہیں تو موجودہ معاہدہ اپنے دوسرے مرحلے میں داخل نہیں ہو سکے گا۔ حماس نے ثالثی کرنے والے ممالک سے یہ درخواست کی ہے کہ وہ اسرائیل پر دباؤ ڈالیں تاکہ وہ معاہدے کی مکمل پاسداری کرے۔
یاد رہے کہ 10 اکتوبر کو ہونے والے امن معاہدے کے باوجود اسرائیلی فوج کی کارروائیوں میں اب تک 370 سے زائد فلسطینی شہید ہو چکے ہیں، جس سے کشیدگی میں مزید اضافہ ہو گیا ہے۔ حماس اور اسرائیل کے درمیان جنگ بندی پر اتفاق کے باوجود، جنگی کارروائیاں رکنے کا نام نہیں لے رہی ہیں، جس کے باعث صورت حال مزید پیچیدہ اور انسانی بحران سنگین ہوتا جا رہا ہے۔